Иако не сум дел од кандидатите на овие локални избори, ја следам кампањата и непријатно ме изненади еден коментар на кандидат за градоначаник на град Скопје, г-ѓа Петровска, каде префрлува одговорност на погрешна адреса. Имено, Ана Петровска е една од авторките на Студијата за оцена на влијанието врз животната средина на проектот за Национален гасификационен систем во Република Македонија Делница 5 Скопје-Гостивар-Кичево (Гасоводот на Водно) од 2011 година, обвини директорот на „Пошта“ и поранешен министер Јани Макрадули.
Според неа, за таа траса, одобрена и препорачана од Петровска, дека не влијае штетно на природата, граѓанските организации реагирале, а во координирана акција на неколку владини институции во 2018-та година:
Од првичниот проект, направена е измена на трасата, и со тоа за 70% се намали должината каде се сечеа дрвца.
Невладините организации имаа увид во комплетната документација на проектот, затоа впрочем и учествуваа во процесот на измените кои се направија за намалување на влијанието врз животната средина (стеснувањето на трасата и промената на 4км од дел од трасата со што се избегна високостеблеста шума).
Со цел надоместување на штетата со исечени дрва, Владата донесе заклучоци со кои се предвидоа серија активности за рекултивација и пошумување на парк шума Водно, согласно предлозите на граѓанските здруженија.
Затоа Петровска не може да избега од нејзиното дело во 2011-та година, објави Макрадули на својот Фејсбук профил.
„Не сум потпишала, ниту сум била консултирана, ниту имам информации кога е одобрено од министерството за животна средина, рече денеска кандидатката за градоначалник на Скопје, Ана Петровска и ја демантираше објавата на Макрадули дека токму таа е една од авторките на студијата за оцена на влијанието врз животната средина на проектот за Национален гасификационен систем во Република Македонија Делница 5 Скопје-Гостивар-Кичево (Гасоводот на Водно) од 2011 година.
Таа додаде дека била дел од соработниците во студијата, но не застанала позади неа.
„Гасоводот не требаше да помине, но не беше на мене јас да одлучувам или да го потпишам или соопштам“, изјави Петровска.
И. З.
