Постот што се споделува на Фејсбук ја манипулира јавноста дека во Сингапур била направена обдукција на починат пациент од ковид-19 и било констатирано дека не се работи за вирус, туку за бактерија. Станува збор за пост кој се споделуваше и во други држави, а во кој се тврди дека наводно сингапурските лекари откриле интраваскуларна коагулација која се лекува со антибиотици. Ваквите тврдења одамна беа демантирани од министерството за здравство на Сингапур од каде соопштија дека не е направена обдукција, ниту пак, препорачуваат други протоколи на лекување на болни од ковид-19, пишува „Вистиномер“ во новата анализа.
Објавата на Фејсбук, која за неколку дена доби голем број споделувања, ја доведува во заблуда јавноста дека ковид-19 е глобална измама. Во неа се тврди дека сингапурски лекари направиле обдукција на починат ковид пациент, при што констатирале дека не станува збор за вирус, туку за обична бактерија, која, изложена на зрачење, предизвикува згрутчување на крвта. Од таа причина сингапурското министерство за здравство веднаш ги сменило протоколите за лекување, а за да биде поубедлив постот како извор е ставено токму тамошното министерство.
Сингапур стана првата земја во светот што изврши обдукција на тело со C # O # VI # D-19. По темелно истражување, откриено е дека C # o # v # i # d-19 не постои како вирус, туку како бактерија која била изложена на зрачење и предизвикува човечка смрт со згрутчување на крвта. Откако лекарите ги отвориле и внимателно ги прегледале рацете, нозете и другите делови на телото, забележале дека крвните садови се шират и се полнат со згрутчување на крвта, што го попречува протокот на крв, а исто така го намалува протокот на кислород во телото, предизвикувајќи смрт на пациентот. Откако дозна за оваа студија, сингапурското Министерство за здравство веднаш го смени протоколот за лекување на C # o # v # i # d-19 и им даде аспирин на своите позитивни пациенти. Почнаа да им даваат на пациентите 100 мг аспирин и Иморак. Како резултат на тоа, пациентите почнаа да се опоравуваат и нивното здравје почна да се подобрува. Сингапурското Министерство за здравство евакуираше повеќе од 14.000 пациенти за еден ден и ги испрати дома, стои во објавата на Фејсбук.
Истата ФБ објава со идентична содржина изминативе месеци циркулираше и на повеќе јазици за повеќе говорни подрачја посебно во соседна Србија.
Министерстовото за здравство на Сингапур во јуни годинава ја демантираше ваквата објава, истакнувајќи дека не била направена обдукција на ковид пациент, ниту, пак, се променети протоколите за лекување утврдени од Светската здравствена организација (СЗО). Оттаму апелираа до сите изворно да се информираат од нивната официјална интеренет страна, која постојано се ажурира со податоци.
Свесни сме дека кружи порака оти Сингапур извршил обдукција на пациент со COVID-19 и наводни промени во протоколите за лекување. Содржината се припишува на Министерството за здравство – Сингапур. Ова НЕ е точно. ФАКТИ – Сингапур нема направено ваква обдукција. Пораката наведува лажни информации во врска со патофизиологијата на инфекција со COVID-19, која не се појавува со сегашните докази, стои во ФБ објавата на министерството за здравство на Сингапур.
Светската здравствена организација (СЗО) одамна констатира дека причина за ковид-19 е вирусот SARS-CoV-2, а не бактерија, како што се наведува во ФБ објавата што ја рецензираме. Тоа го потврдија и здравствените власти на САД, Велика Британија, но и од други држави.
СЗО во своите протоколи за лекување објави дека антибитоците не ја лекуваат болеста ковид-19 предизвикана од вирусот SARS-CoV-2, туку може да се дава на ковид пациенти за да се спречат бактериски инфекции.Тоа го тврди и министерството за здравство на Сингапур.
Аспиринот нема директно влијание врз вирусот што предизвикува Ковид-19. Ако не се чуствувате добор одете на лекар за да бидете тестирани и соодветно третирани, стои на официјалната веб страницата на сингапурското минИстерство за здравство.
Директорката на Светската здравствена организација за глоблана подготвеност од заразни болести, д-р Силви Брајан во видео објавено на јутјуб каналот на СЗО од октомври 2020 година објаснува кога се дава антибиотик на ковид пациенти.
Употребата на антибиотик при лечење од Ковид-19 нема да помогне, бидејќи станува збор за вирус, а не за бактерија. Но, она што го видовме кај одредени хоспитализирани пациенти, кои добија антибиотици, е за спречување бактериски инфекции, бидејќи некои пациетни се слаби и и кревки и се плашиме дека покрај Ковид-19 може да добијат бактериска инфекција, кажа д-р Брајан.
Сублимирајќи ги сите информации може да се констатира дека објавата која се споделува на Фејсбук е неточна. Сингапур нема извршено обдукција на ковид пациент, ниту има констатирано дека ковид-19 е бактерија која се лекува со аспирин. Од таа причина ниту, пак, ги има променето протоколите за лекување на ковид-19 препроачани од СЗО. Така што ваквата објава ја оценуваме како дезинформација, пишува „Вистиномер“.
