Националниот координатор Марјан Забрчанец истакна дека промоцијата на платформите за брз пристап, добивање и размена на проверени информации е резултат на еден од столбовите на Акцискиот план на Владата за борба против дезинформациите – соработката со сите чинители во оваа борба како што се медиумите, новинарските и граѓанските организации и академијата.
Кон ова, нагласи Забрчанец, треба да се додаде и компатибилноста на новите платформи со другите столбови на Акцискиот план на Владата како што се активна транспарентност, медиумската писменост и системот за брз одговор и реакција на дезинформациите.
Општините мора да продолжат да ја зголемуваат својата транспарентност, нагласи Забрчанец, и додаде дека не смее да се дозволи новите раководства на локалните самоуправи да ги затворат општините и да ја уназадат транспарентноста која на централно ниво неколку години има прогрес.
Во однос на медиумската писменост националниот координатор Забрчанец посочи дека на неа не треба да се гледа само како долгорочна алатка, туку и како на можност за спроведување активности за кревање на јавната свест за критичко размислување и дигитална писменост во заеднички проекти со новинарските и граѓанските организации, како и со академската средина и медиумите.
Новите платформи за комуникација, креирани од Фондацијата Метаморфозис, се во рамките на програмата Медиуми за демократија и заложбата за засилување на борбата против дезинформациите, и се реализираат со поддршка на Владата на Република Северна Македонија.
На апликацијата WhatsApp, се поставени четири канали за брза комуникација на новинарите преку директни контакти со соодветните јавни институции за да ја проверуваат вистинитоста на информации пласирани во јавноста на теми од општествена важност за граѓаните како што се: КОВИД-19, Животна средина, Интеграции и Пописот.
На онлајн промоцијата и дебатата денеска учествуваа и Катерина Синадиновска, претседателка на Управниот одбор на Советот за етика на медиумите на Македонија, Бардил Јашари, извршен директор на Фондацијата Метаморфозис, Горан Ризаов, менаџер на програмата „Медиуми за демократија“ на Фондацијата Метаморфозис, како и повеќе новинари и претставници на медиумски организации.
