Оние кои најавуваат ново парламентарното мнозинство по вториот круг од изборите треба да кажат и дали се за Преспанскиот Договор или за Договорот со Бугарија, за ЕУ и НАТО, бидејќи тие се основите за коалицирањето во Парламентот. Постојното парламентарно мнозинство може само да расте, а не да биде променето, вели премиерот Зоран Заев.
Тој на прес-конференција во Владата запрашан дали гледа закана за стабилноста на парламентарното мнозинство, откако Алтернатива ја отфрли можноста дека ќе се приклучи во владиното мнозинство, а БЕСА доби поддршка од Алијанса за Албанците за кандидатите во Тетово и во Желино, рече дека тоа е „легитимно право“.
– Апсолутно не. Локални избори се, легитимно е политичките партии да прават свои партнерства, коалиции и договори за настап во вториот круг од изборите се со конечна цел да успеат со своите кандидати, почнувајќи од СДСМ, ВМРО-ДПМНЕ, ДУИ, Алијанса, БЕСА, Алтернатива и сите други политички субјекти кои учествуваат во вториот круг, порача Заев.
Тој повтори дека коалициите и мнозинството имаат природна причина за нивно создавање, опстојување или расформирање, како и создавање на ново мнозинство.
– Треба да кажат сите кои најавуваат вакви разврски на настаните после вториот изборен круг, ќе бидат за Преспанскиот Договор или за Договорот со Бугарија, за едно општество за сите, за Законот за употреба на јазиците или ќе бидат против. Во суштина е тоа, ќе бидат за ЕУ и интеграциите низ пријателски дијалог и дипломатија или ќе бидат за клинч. На тоа се основаат коалициите и парламентарното мнозинство. Јас тврдам дека парламентарното мнозинство ќе порасне, и ако читате точно што кажа Алтернатива вели „по вториот изборен круг во понеделник ќе биде објавено ново владино мнозинство, па прашајте ги за кое владино мнозинство размислуваат, рече Заев.
Премиерот нагласи дека СДСМ има добра соработка со Алтернатива и има добра перспектива да и служат на државата на евроинтегративниот процес, на процесот на едно општество за сите, а не, како што вели, на национализмот на Алијанса и на ВМРО-ДПМНЕ
На прашањето дали доколку се случи ново владино мнозинство се сигурни ЕУ и НАТО процесите, Заев повтори дека НАТО и ЕУ се главни стратешки приоритети и една од основите за коалицирањето во Парламентот да се одржи и да расте.
– Контра НАТО и ЕУ нема политички субјекти кои што би се приклучиле на ВМРО-ДПМНЕ затоа што нивните политики се контра НАТО и ЕУ, односно кавги со Бугарија, веднаш со Грција, не го употребуваат Северна од уставното име на Република Македонија. Никој ниту на долг, ниту на среден, ниту на краток рок не сака да ја уништи својата политичка партија како политички субјект или својата лична политичка кариера. Така што иднина нема за друго парламентарно мнозинство. Јас се надевам дека ќе порасне тоа парламентарно мнозинство, како што реков, Алтернатива е повредена, потценета и понижена во целиот овој период на нивното коалицирање. Тоа се гледа јасно во Парламентот и секаде, истовремено, дополнително е понижена со тоа што е натерана да влезе во коалиција со ВМРО-ДПМНЕ на овие избори. На крајот и самките гласови на Алијанса и Алтернатива покажува многу и испраќа порака што е одржливо, а што не е одржливо. На сите пресови Беса потврдува дека стои зад мнозинството и сите други политички партии. Така што постојното парламентарно мнозинство може само да расте, а не да биде променето, подвлече Заев.
Во однос на забелешките на ЕК во Извештајот за законските измени на изборното законодавство, донесени во последен момент без дискусија и широки консултации, Заев посочи дека измените биле во согласност со препораките на ОБСЕ/ОДИХР, усогласувани се една година од работна група и се донесени со усогласеност од сите, со речиси двотретинско мнозинство од 78 гласа „за“, два против и само еден воздржан. Дел од измените кои беа претходно усогласени, додаде тој, беа блокирани со амандмани од Левица.
