За лидерот на ДПА, Мендух Тачи, објавата на лидерот на ВМРО-ДПМНЕ, Христијан Мицкоски, дека заедно со пратениците од Алијанса за Албанците/Алтернатива, БЕСА и Левица формирал ново парламентарно мнозинство е само уште еден голем театар. Според него, овие партии немаат моќ да ги предводат политичките процеси во државава.
„Ова е уште еден голем театар на тие што реално немаат моќ да ги предводат политичките процеси во државава. Вчерашните актери што ги видовме на фотографијата со Мицкоски само му ги местат коцките на Заев. Можеби несвесно, но му прават платформа за негов камбек. Следната влада ќе биде на чело со Заев“ – изјави Тачи за „Слободен печат“.
Тој вели дека не познава друг човек во СДСМ со поголеми капацитети од Заев
Според Тачи, албанските лидери кои вчера се сликаа на оваа фотографија скапо ќе ги чини тоа кај Албанците.
„ВМРО-ДПМНЕ е десничарска партија која не го признава и почитува ниту Охридскиот, ниту Преспанскиот договор, а во новата политичка констелација на Балканот ниту Косово, ниту пак заложбите на државава за членство во ЕУ. Алтернатива сака само да ги зајакне своите преговарачки капацитети во Владата на Заев, а Беса сака само да ги зачува своите места во Владата, па од една страна преговара со ВМРО-ДПМНЕ, а му испраќа сигнали на СДСМ за да си ги зголемат нивните идни преговарачки позиции во Владата на Заев“ – вели Тачи.
Медиумите на албански јазик синоќа потсетија на ставовите на Аријаните Хоџа за Апасиев, за потоа да се фотографира со него.
„Во ново парламентарно мнозинство со гласови кои зависат од партија како што е Левица, која во својата програма има изразити антиамерикански и антиалбански пристап, не можеме да влеземе да разговараме и не можеме да дозволиме една таква влада да зависи од политичка партија која е деструктивна и знаеме во која насока ќе ја води државата“, потенцираше пред извесно време Аријанит Хоџа.
