Претставникот на фудбалерот од средниот ред на Манчестер јунајтед, Пол Погба ги демантираше гласините за предлогот на клубот да го продолжи договорот со него.
Ова лето истекува рокот на актуелниот договор меѓу Французинот и Јунајтед. Фудбалерот ќе стане слободен играч доколку не се согласи да ја продолжи соработката со клубот.
– Би сакале да ги разјасниме информациите што се појавија во медиумите. Пол немаше никакви предлози за обновување на договорот во последните месеци. Тој сега е целосно фокусиран на закрепнување од повредата за да му помогне на тимот што е можно поскоро, изјави портпаролот на Погба.
Претходно во британските медиуми се појави информација дека Манчестер јунајтед е подготвен да му плаќа на 28-годишниот играч за врска 500 илјади фунти неделно според условите од новиот договор.
извор: МИА
