Шинед О’Конор ги критикуваше ирските власти по смртта на нејзиниот 17-годишен син Шејн, за кого таа тврди дека ја напуштил болницата додека „бил под надзор за самоубиство“, пренесува Гардијан.
Пејачката ја објавила веста за смртта на Шејн на социјалните мрежи во саботата, пишувајќи: „Мојот прекрасен син, Невиим Неста Али Шејн О’Конор, самата светлина на мојот живот, одлучи да ја заврши својата земна борба денес и сега е со Бога.“
„Нека почива во мир и никој да не го следи неговиот пример. Моето бебе. Те сакам многу. Почивај во мир“.
Шејн О’Конор бил пријавен за исчезнат два дена пред неговата смрт. Исчезнал од Њубриџ, на округот Килдер, а последен пат бил виден во петокот наутро во областа Талахт во Даблин. Полицајците рекле дека се загрижени за неговата благосостојба.
Во серија твитови во саботата вечерта, по полициската потврда за неговата смрт, ирската пејачка ги осуди властите, вклучително и ирската здравствена служба „HSE“ и агенцијата за деца и семејство Тусла, за нивното „одбивање да ја прифатат одговорноста“.
Таа напиша: „26 часа откако мојот син почина во таканаречената грижа на Ирската држава во форма на Тусла, сè уште немам добиено никаков контакт од Тусла или нивните претставници. Ниту еден контакт од Тусла не е неприфатлив“. Таа подоцна објави дека „формално ги идентификувала посмртните останки на мојот син“, додавајќи: „Бог да ѝ прости на ирската држава бидејќи јас никогаш нема да го направам тоа“.
Во друг твит, таа вели: „Сега Тусла сака да разговара со мене за „соопштение за медиумите“ без сомнение сакајќи да се приклучам во нивните напори оваа смрт на моето дете да изгледа како да не е во рацете на ирската држава“.
На пејачката ѝ се испратени илјадници пораки со сочувство на социјалните мрежи, вклучително и од јавни личности и други мајки кои поминале низ слични искушенија.
превод: Марија Миткоска
