пишува: БОРЧЕ БОКИ ТРАЈКОВСКИ
Луѓето честопати прават нешто, за кое кога ќе ги прашаш зошто го направиле, одговорот е “не знам“! Да. Повеќето од нив не знаат зошто го направиле тоа што го направиле. Ова не е заебанција, да се разбереме, туку, сериозен дефект кај масите кои потсвесно наседнуваат односно подлегнуваат на немилосрдните притисоци од пропагандните машинерии, или маалски речено, од притисокот на муабетите. На пример, кога ајдуците постојано ќе почнат да извикуваат држте ги крадците, и, кога сето тоа интензивно се пренесува преку медиумите, на билбордите, во електронските и печатените медиуми, тогаш, масите несвесно го прифаќаат алармот и се приклучуваат кон апелите на докажаните ајдуци. Тие се подготвени да ги подржат ајдуците за наводно да се спасат од апашите. Таа пропагандна машина квалитетно ја употребува ДПМНЕ. Тие се докажани апаши, во чија средина речиси цело раководство им се влечка по судови каде ги очекуваат долгогодишни затворски казни, ама не застануваат со пропагадната мантра за ајдуците во СДСМ, за криминалот на Заев и тајфата. И не сопираат. Тие постојано, со сесрдна поддршка на медиумите, го пласираат во јавноста тој повик „држ те го крадецот“, од најарамијското гнездо во државава не жалејќи пари, многу пари откраднати од државата…
Истото орудие го користат и со идиотизмот за „брзи предвремени избори“. Не престануваат и постојано го репродуцираат истото од секоја говорница, од секој чинител кој има шанса да се појави пред камери, да диши во микрофони, да добие интервју, да добие насловна страница. И, сите медиуми, заради тоа што „дебело“ се палтени, во насловите ја пласираат таа идиотштина. Сите бараат предвремени избори, сите се повикуваат на нелегитимитетот на Ковачевски затоа што истиот, премиерскиот мандат не го стекнал на избори, туку со договор меѓу партиите. За нив не важи шансата која ја доби Ковачевски, онаа истата шанса со која тие пред месец и нешто се соочија за да ја урнат владата на Заев ама не обезбедија мнозинство, сега, токму тоа мнозинство за опстанок на владата кое го обезбеди Ковачевски и да се промовира во нов премиер на Македонија, замислете, за нив е нелигитимно. Узми уби па ме пушку, ќе рече Боки Бургија…
Но, шала на страна. Работава е сериозна. „Нож је прешаја коску“! Затоа ќе ве потсетам на еден резултат од истражувањата на американска компанија за влијанието на пропагандата врз масите. Што се случило? Имено, во еден град, тоа утро, сите билборди осамнале со плакати во резедо боја на кои не пишувало ништо. Вечерта на телевизиите во кратки видео пораки, во траење од две секунди, на гледачите во сите емисии и на сите канали им се појавувала истата боја на екранот, без да се прочита или слушне порака за тоа што значи ова. Дента, на гондолите каде биле изложени пастите за заби, стотици врсти, во само една колона имало наредени резедо кутии на кои не пишувало ништо. Тие пакувања ја имале истата боја како онаа која ја гледале низ градот, или сношти во сосема кусите видео објави на рекламните пораки. На излезот од маркетите, кај наплатните благајни стоеле луѓе кои имале задача да ги прашуваат луѓето зошто од сиот избор на каладонти тие се одлучиле да го земат овој со резеда боја на која не пишува ништо, дури не се знае дали воопшто таму има паста за заби. Најчестиот одговор бил – „Не знам“ и смешкање…
Во тие кутии имало туби со резедо крема за прелив на шпагети. Најбрзо се празнела таа редица на полиците за пасти за заби во сите маркети во градот, а на сите наплатни места истите биле тргани на страна за да луѓето задолжени за тестот им го постават оноа прашање погоре, а терминалот не отчукувал цена на производот. Таа туба со тој намерно невкусен и несоодветен прелив за шпагети, сите ја добиле бесплатно, за да го почувствуваат заебот на пропагандата, иако не знаеле зошто ја одбрале зошто ја земале, а верувале дека е паста за заби само заради тоа што била изложена на таа гондола…
Наравоучението е едноставно и лесно се препознава, ама, тешко, многу тешко се елиминира откако ќе се заебеш. Дури и тогаш кога ништо не пишува на паковката, кога сите креваат раменици на прашањето што значи оваа резедо боја, кога никој го нема одговорот, масите влегуваат во ризик за први да дознаат дека се заебале. Ебиго друже судија, ама тоа е, такви сме. Неодамна Македонија одбра градоначалници предложени од апашкото гнездо на ДПМНЕ, па и Скопје доби независна Кметица во портокалова паковка, па наместо “паста за заби“ односно невкусен “прелив за шпагети“, добивме пролив од кој ќе може да се празниме во ТОИ тоалетите на кејот на најзагадената река во метрополата, една од првите значајни инвестиции на скопската кметица Данела. Не е таа виновна што била сместена во портокаловата кутија на ДПМНЕ амбалажата, туку, ние, кои сме ја земале истата, а откако сме ја отвориле, помирисале, вкусиле, сме почнале да ја шутираме и да се бунтуваме. Се сеќавате ли што пишуваше на “етикетата“ на кандидатката Данела во кампањата? Ништо. Пластична насмевка, поглед без очи, крик без глас, суви пораки, празна содржина. Исто како на оние резедо паковки на полицата за пасти за заби во примерот погоре. Затоа не се наседнува на секоја скапа пропаганда, на секоја понуда, без инфо за квалитетот, за содржината, за потеклото и рокот на траење на понуденото, без да имаш податоци за изворот на мантрата со која те дупат у мозок, па не можеш да ги обвиниш заради сопствената лековерност. Е тоа е таа ДПМНЕ пропаганда на која треба да се отвараат сите четири, за да не биде доцна…
Текстот е личен став на Авторот. Сите права се задржани