Здружението на новинарите на С. Македонија бара дефиницијата за навреда во Предлог- законот граѓанска одговорност да се коригира и да се врати старата дефиниција од законот од 2013 година која, во тоа време, беше позитивно оценета и од ОБСЕ и Советот на Европа.
Од ЗНМ денеска реагираа на актуелната верзија на Предлог- законот за граѓанска одговорност, каде во дефиницијата за навреда се вели дека ќе се одговара и за изразување на „негативно мислење“. Оваа дефиниција, сметаат од ЗНМ, е нова и се разликува од постоечкиот закон, а на начинот на кој е дефинирана остава простор за погрешно толкување од страна на граѓанскиот суд на штета на слободата на изразување.
„Иако во локалната судска пракса предметите кон медиумски работници се пред се за клевета и речиси да нема за навреда, ваквата дефиниција доколку не се измени може да поттикне во иднина бран на тужби кон новинарите само за искажано мислење што во основа е спротивно со начелата на слободата на изразување и правото на информирање на граѓаните“, се вели во соопштението на Здружението.
Текстот на овој Предлог закон за граѓанска одговорност е во фаза на прво читање во Собранието од јули 2021 година. Истиот текст предвидува значително намалување на нематеријалната штета за новинарите и медиумските работници како барање што ЗНМ претходно го имаше кон Министерството за правда.
Од Министерството за правда денеска соопштија дека формулацијата во Предлог- Законот за граѓанска одговорност е грешна и најавија дека ќе се интервенира во амандманската расправа.
„Министерството за правда целосно ги поддржува новинарски слободи и права и сите закони ги носи заедно со здруженијата, а во интерес на објективното и слободното информирање“, пишува во соопштението од Министерството.
Извор: МЕТА
