Подигнување на квалитетот на наставата во високото образование е интерес на академската заедница, но и поширок општествен интерес, и затоа Министерство за образование и наука посветува посебно внимание на креирањето политики за подобрување и унапредување на функционирањето на универзитетите и научната дејност во државата.
Како што информира МОН, тоа е заклучено на денешната работна средба меѓу министерот за образование и наука Јетон Шаќири и ректорот на Универзитетот „Св. Климент Охридски“ во Битола, проф. д-р Сашо Коруновски, кои разговараа и за продолжувањето на поддршката за поттикнување на научно-истражувачката дејност, почната минатата академска година.
-Почитувајќи ја автономијата на универзитетите, МОН секогаш е отворено да ги слушне нивните предлози за унапредување на образовната и научната дејност. Ќе ја интензивираме соработката, како најдобар начин за постигнување на стратешките цели поврзани со високото образование. Мислењето на професорите за нас е важно во носењето и реализирањето на реформите, нагласи министерот Шаќири.
Ректорот Коруновски, како што се наведува во соопштението, истакна дека УКЛО вложува континуирани напори за успешна реализација на студиските циклуси. Истовремено, заложба на УКЛО е создавање услови за поттикнувачко и мотивирачко научно опкружување и затоа е добредојдена поддршката на МОН за развивање на постојните и воспоставувањето нови научно-истражувачки лаборатории.
Шаќири и Коруновски на состанокот разговаа и за текот на академската година во услови на КОВИД-19.
Извор: МИА
