Елена Ковалскаја, директорка на државниот театар во Москва, денеска поднесе оставка во знак на протест поради руската инвазија на Украина. Таа го нарече Владимир Путин како „убиец“ и јавно објави дека се повлекува од својата улога.
Ковалскаја, која е директорка на театарот Мејерхолд Центар рече:
„Пријатели, во знак на протест против руската инвазија на Украина, поднесувам оставка.
И таа додаде: „Не можете да работите за убиец и да добивате плата од него“.
Таа рече дека ќе ги заврши своите актуелни проекти.
Театарот кој го носи името од рускиот драматург Всеволод Мејерхолд ја опиша немилосрдната агресија на Русија во Украина како нешто што „сега дојде во трагичен конфликт со нашата мисија“.
„Не можеме да молчиме за ова. Ни останува само ова да кажеме: „Не на војната““.
„Војната е многу повеќе од непочитување кон една личност и многу пострашна. Војната е смрт на човек, тоа е убивање луѓе“.
Театарот, исто така, се заблагодари на Ковалскаја за нејзината „храброст“.
Во меѓувреме, Московскиот театар Мајаковски им забрани на своите актери да даваат какви било коментари во врска со инвазијата. Во белешката споделена на социјалните мрежи тие напишаа „Управата на театарот ве моли да се воздржите од какви било коментари во врска со воените дејствија во Украина. Во спротивно, ќе го разочарате театарот. Според информациите добиени од Министерството за култура, секој негативен коментар ќе се смета како предавство“.
Бољшој театар сеуште нема излезено со официјален став во врска со нападите на Русија кон Украина. На нивната официјална страна во текот на вчерашниот ден објавија подготовки за нова претстава, чиј чин од стана на фановите беше осуден како ладнокрвен и циничен.
Инвазијата е во тек, со извештаи дека руските сили се преселиле во главниот град Киев. Од утринава, според извештаите на медиумите, руските сили го заземале аеродромот во градот – а борбите се во тек низ целиот регион.
Владанка Крстевски
