Што се случи?
Украинските власти соопштија денеска дека околу 2:30 часот по локално време дека избувнал пожар во комплексот за нуклеарната ентрала, лоциран во Енерходар, југоисточна Украина. Централата е најголема од ваков вид во Украина и содржи шест од 15-те нуклеарни енергетски реактори во земјата, според Меѓународната агенција за атомска енергија (МААЕ).
Борбите оттогаш престанаа во областа, изјави за Си-Ен-Ен портпаролот на електраната, Андриј Туз.
Колку е сериозна ситуацијата?
Тешко е да се каже бидејќи се уште има многу што не се знае – како на пример каде се наоѓа пожарот во комплексот, дали реакторите биле погодени, дали има секундарни и терциерни системи за ладење. Но, ентралата не претрпе никаква „критична“ штета, рече Туз. Пожарот не зафатил ниту една „суштинска“ опрема, а персоналот презема активности за ублажување на каква било штета, соопшти МААЕ, повикувајќи се на украинските власти.
Дали има зголемена радијаија?
Не – нуклеарните регулатори и владините тела во САД и Украина велат дека нивото на радијација во моментов изгледа нормално.
Американскиот секретар за енергетика Џенифер Гранхолм објави дека реакторите на украинската нуклеарна централа Запорожје „се заштитени со робусни структури за задржување и реакторите безбедно се затвораат“. Гранхолм на Твитер објави дека штотуку разговарала со министерот за енергетика на Украина за ситуацијата во централата, каде што избувна пожар за време на борбите меѓу руските и украинските сили. „Не видовме зголемени отчитувања на радијацијата во близина на објектот“, нагласи Гранхолм.
Кои се ризиците и колку се веројатни?
Најлошото сценарио би било доколку пожар или напад погоди реактори, го наруши нивниот систем за ладење и предизвика топење, што би ослободило голема количина радиоактивност.
Греам Алисон, професор во Центарот Белфер на Универзитетот Харвард, изјави за Си-Ен-Ен денеска дека блоковите имаат системи за автоматско гаснење на пожари, но не и „сите пожари“ – така што ситуацијата зависи од тоа каде се случува пожарот. И „не сите пожари во електраната имаат катастрофални последици“, рече тој.
Во меѓувреме Украинските служби за итни случаи соопштија дека го изгаснале пожарот.
Изгаснат пожарот во нуклеарката во Запорожје
Украинските служби за итни случаи соопштија дека го изгаснале пожарот во најголемата нуклеарна централа во Европа. Киев тврди дека руските сили гранатирале и дека се одговорни за пожарот.
„Во 06:20 часот е изгаснат пожарот во зградата за обука на АЕЦ Запорожје во Енергодар. Нема жртви“, соопштија украинските служби за итни случаи.
