Проруски поддржувачи шират лажно монтирано видео во кое има кокаин на бирото на Зеленски

Дел од македонските граѓани не сакаат да веруваат во вистината, односно дека се работи за лажна монтирана снимка. Подобро им е да ги лажат, односно да веруваат дека „Путин ги чисти дрогирашите“, а не дека во Украина гинат невини цивили меѓу кои жени и деца.

Руската пропаганда станува сè „покреативна“, на социјалните мрежи кружи кратко монтирано видео на кое украинскиот претседател Володимир Зеленски разговара со неколку луѓе преку видео повик, вклучувајќи го и основачот и извршен директор на Tesla и сопственик на SpaceX, Илон Маск, додека на неговата маса има кокаин и кредитна картичка.

На лажната монтирана снимка се гледа бел прав и кредитна картичка на бирото на Зеленски, но оригиналната снимка објавена на Youtube каналот јасно покажува дека нема недозволени супстанци.

На хрватската Фејсбук група Борбени ефекти се споделува монтираното видео во кое се манипулира со граѓаните дека украинскиот председател конзумира дрога. Ова лажно видео има повеќе од 1.800 споделувања и над 600 коментари, меѓу кои има неколку кои пишуваат дека е монтажа, меѓутоа поголемиот дел веруваат дека се работи за автентична снимка, а не дека е видеомонтажа.

За лажната монтирана снимка објавија и неколку македонски медиуми, меѓутоа дел од граѓаните и понатаму не сакаат да веруваат во вистината, подобро им е да ги лажат! Односно да веруваат дека „Путин ги чисти дрогирашите“, а не дека во Украина гинат невини цивили меѓу кои жени и деца, како што е разубедена една македонска граѓанка.

Ваквите дезинформации и лаги на руската пропаганда е да ја оправдаат руската агресија и да се обидат да ги разубедат граѓан(к)ите дека во Украина се води „специјална војна“ против нацистите, а сега и против наркоманите како што се обидуваат да го прикажат Зеленски.

Сепак, лагите на руската пропаганда имаат краток рок на траење.

Дехран Муратов/ЦИВИЛ