По информациите кои проциркулираа во јавноста дека Горан Мисовски ќе биде единствениот кандидат за Претседател на НСДП, а кои беа демантирани од Претседателот во заминување Тито Петковски, денес преку својата нова фејсбук страница се огласи и долгогодишниот Организациски Секретар на партијата, Кристијан Трајковски.
Тој објави дека ја поднел својата кандидатура и Програма согласно Правилникот и дека сепак, како што вели, во НСДП ќе се одржи демократски натпревар за избор на следниот Претседател на партијата.
Соопштението на Трајковски го пренесуваме во целост.
„Изминативе седумнаесет години, заедно во НСДП ги делевме сите битки, тешкотии, но и успеси. Како еден од основачите, потоа преку сите скалила и функции низ мојот развој во партијата и конечно како Организациски Секретар на Новата Социјалдемократска партија, имав прилика да ги запознаам речиси сите членови и да разговараме за заедничките маки, но и нашата визија како да допринесеме до подобра живејачка во Северна Македонија.
НСДП секогаш била партија каде припаѓам и се пронаоѓам. Преку напорната работа и борбите кои ги водевме заедно со членовите, симпатизерите и поддржувачите, НСДП стана мојот дом. Денес, НСДП е моето проширено семејство во кое одлучив да ги вложам сите мои капацитети и знаење, моето срце и душа.
Одлуката на нашиот претседател Тито Петковски, да се повлече од својата функција ја примив со жалење. Тој пред нас постави огромни политички и хумани стандарди, но и ни остави одговорност за иднината на нашата држава и иднината на НСДП, без разлика кој ќе биде следниот претседател на партијата.
Затоа, одлучив да се кандидрам за Претседател на НСДП, кој ќебиде избран на петтиот Конгрес на партијата, на 04.06.2022. Согласно Правилникот, ја доставив мојата кандидатура и Програма во предвидениот рок пред органите на партијата.
Живееме во време на големи глобални ризици, економска несигурност и нестабилност. Денес, повеќе од било кога потребни се алтруизмот, солидарноста и социјалната грижливост на социјалдемократските и левите партии. Да им помогнеме на граѓаните да се издигнат од немаштијата и да ја насочиме државата кон прогресивните, западни демократски вредности. Тоа е зацртаниот пат на Северна Македонија и не смееме да дозволиме било какво отстапување. Нема да дозволиме политичкиот опортунизам, поделбите и омразата меѓу нашите сограѓани да се зголемува и продлабочува. Политички опортунизам и поделби од кои за жал не е лишена ниту нашата НСДП.
Сега на партијата и’ треба лидер кој ќе може да се исправи пред партиските, државните и меѓународните предизвици. Лидер кој ќе одолее на личните интереси и ќе остане посветен на идеологијата која нѐ поврзува, на нашата солидарност и бескомпромисна борба за правда.
Време е за нова енергија и нови луѓе, кои ќе градат врз темелите на наследството од минатото и ќе ја донесат НСДП во следната фаза од нејзината политичка еволуција.
Време е за прогресивна, обединета и гласна НСДП, која ќе биде сериозна лева опција на политичката сцена и ќе дејствува како строг чувар на социјалдемократските и човечките вредности, без разлика дали тоа ќе го прави од позиција на власт или опозиција.“, пишува Трајковски
Вчера, повеќе медиуми објавија партиско соопштение од НСДМ, во кое стои дека Извршниот одбор на НСДП за единствен кандидат за претседател на партијата го утврдил актуелниот пратеник и потпретседател на Собранието, Горан Мисовски.
„Извршниот одбор на НСДП на 26-тата седница одржана на 11 мај 2022 година врз основа на евидентираните предлози за претседател на НСДП од општинските организации, а согласно Правилникот за постапката, начинот и критериумите за кандидирање и избор на делегати за Петтиот Конгрес на НСДП, кандидати за претседател на НСДП и кандидати за членови на Централниот одбор и Надзорниот одбор на НСДП, на Централниот одбор на НСДП кој ќе се одржи на 14.5.2022 година му предлага да донесе Одлука за утврдување на единствен кандидат за претседател на НСДП: – Горан Мисовски, потпретседател на НСДП. Предлог-одлуката беше усвоена со мнозинство гласови, односно со 10 гласа ЗА од вкупно 17 члена на Извршниот одбор“, се наведува во партиското соопштение.
Претседателот во заминување на НСДП, Тито Петковски, тврди дека Мисовски не е единствен кандидат.
Одлуката на Одборот за подготовка на петтиот конгрес на Новата социјалдемократска партија (НСДП) на вчерашната седница од која до медиумите беше испратена информација дека единствен кандидат за претседател кој се очекува да биде избран на партискиот конгрес на 4 јуни е Горан Мисовски, е надвор од Статутот и е донесена во мое отсуство, откако јас ја затворив седницата и заминав, тврди Тито Петковски.
Тој вели дека за лидерската позиција на НСДП од општинските организации пристигнале предлози за десет кандидати и дека на синоќешната седница на одборот за подготовка на конгресот не било договорено Мисовски да биде единствен кандидат. Напротив, расправата требало да продолжи на Централниот одбор, кој е највисок партиски орган и кој треба да одржи седница в сабота.
Ј. Ѓ.