пишува: НЕНАД ЈОВАНОВИЌ
Што е скандалозно во тоа што Талат Џафери, претседателот на Собранието, рече, цитирам: „ако не планираш да се тепаш, тргни се“. Или тоа што Џафери пцуел, па тоа на нашите фолиранти им било скандалозно. Можеби зборовите, „ако не планираш да се тепаш…“ или некоја пцовка, тоа, им било навредиливо, скандалозно… Нека ми простат „навредените“ фолиранти, тоа што Џафери го изговара во Собранието не е ништо страшно. Напротив, така секој нормален и пристоен човек би реагирал. Дури на моменти мене ми звучеше и шармантно.
Може ли, Јовановиќ, да ни ги аргументираш овие изблици на револт на Талат Џафери во Собранието? Се разбира. Да одиме со ред.
Секој оној што дебатирал со „вмроовци“ на отворена сцена знае дека тоа не е дебата, туку насилство. Реторичко насилство. Дури, да бидам уште попрецизен: кога „вмроовци“ одат на дебата, тие ниту го гледат, ниту го слушаат соговорникот, па на неговите тези да нафрлат контратези, јок, море! Тие си испуштаат пропагандни пораки, вртат од шупље-во-празно четири тези, на тоа појачуваат со по некоја навреда, во смисла, „предавник“, „бескичмењак“ и слично на тоа. Тоа е „поубавата“ страна од дебатата.
(За љубопитните: се сеќавате кога Груевски му се пикна во фаца и во тело на Џефери, сакајќи да се тепа во Собранието? Се сеќавате Груевски каков булиевец беше? Сте заборавиле, ако, се случува.)
Гадната страна во нивното дебатирање е внесувањето во фаца, ти се пикаат в лице со цел да предизвикаат контрареакција, а потоа да се претвори целата атмосфера во општа калакурница. Од таква калакурница може само „вмроовците“ да профитираат, ако само за момент им се исфрлите пооштро, побрутално или ако ги испратите во 3ЛПМ. Ако ги испратите тамо, ќе почнат да се жалат дека сте радикален, дека со такви како вас нема разбирачка, дека вие сте хулиган, дилетант, а во случајот на Џафери, вие ќе бидете „командант Форина“, па тоа ќе се прошири кон СДСМ и ДУИ, и знаете веќе како оди тој фолклор.
Фактот е дека ВМРО-ДПМНЕ и Левицата на Апасиев се луѓе родени – како политички субјекти – во таква атмосфера. Тие едноставно не знаат поинаку. Ќе ти се пикнат во фаца, па кога ќе ги испратиш онаму кајшто секој пристоен човек би ги испратил, ќе почнат да му се жалат на светот, на галаксијата и млечниот пат.
Понекогаш, лажните левичари и лажните „вмровци“ ми изгледаат како патници во автобус: влегува некој булиевец (читај, насилник), седнува на предно седиште, а до него седи некоја бабичка. Се sвери булиевчето долж автобусот само колку да ја измерка ситуацијата. Сфаќа дека нема кој да го загрози, ѝ ја граба чантата на бабичката и се обидува на следната станица да побегне. И тука, описно-симболички ќе направиме мала пауза.
Знаете ли за кого ќе навиваат лажните „вмроовци“ и лажните „левичари“? Точен одговор: за булиевецот, за насилникот. Еден нема да рипне и рече „држте ја битангата“. Е, така ми личат ВМРО-ДПМНЕ и Левица во Собранието.
Тие Талат Џафери го гледаат како албанец (или „шиптар“); тие Талат Џафери го гледаат како радикално Друг од себе. Тие го гледаат како некој кој не е наш. Типична националистичка дијоптрија на национални далтонисти.
Јас мислам дека Талат Џафери е многу пристоен во Собранието. Толерентен, тие нему на глава му се качуваат, а тој ги слуша, ги „хендла“. И, уште еден детаљ: Талат Џафери е перцепиран во Собрание како „албанец“ или поточно, „шиптар“. До кога тие ќе ни ја водат државата, до кога ние сè ќе им даваме…
Талат Џафери е репрезентативна личност, претставник на огромен број на Албанци, а воедно е и претседател на Собранието. Пратениците на ВМРО-ДПМНЕ од друга страна, не претставуваат никого – барем во овој политички контекст – туку го претставуваат исклучиво Мицкоски и неговата фамозна политичка кариера која гласи: „тате, гледај ме, ќе ти станам премиер“. И тоа е сè. Поточно, тоа е клучната разлика измеѓу Талат Џефери и пратеничињата на Мицкоски. А разликата е огромна. Во светлосни години. Талат некого претставува, претеничињата на Мицкоски освен Мицкоски, кого друг го претставуваат?
Натаму, Талат Џефери беше во Украина. Кај Зеленски. Човекот испрати премногу важни и емпатични пораки, а нашите медиуми скромно известија за постетата на Џафери – како претседател на Собранието на РСМ – оти, нели, „човекот не е наш“. Талат and Џафери е Албанец, море, луѓе, еееј!
И во „случајот Џафери“ гледам уште еден феномен: додека има век и свет, Мицкоски и неговата клика ќе останат тоа: обични дискриминатори-булиевци. Џафери е Албанец кој претставува реални Албанци, а Мицковци кого реално претставуваат? Се претставуваат себе. Таква и партија направија: сите што не сме ние мора да се испратат на буништето на историјата.
Ако се малку чесни, ова треба да им биде слоганот на следните „предвремени парламентарни избори“.
Личен став на Авторот. Дозволено е преземање на текстот според лиценцата Creative Commons 4.0.
