Благодарение на дејствијата на украинските војници – Вооружените Сили на Украина, разузнавањето, преговарачкиот тим, Меѓународниот комитет на Црвениот крст и Обединетите нации, ние имаме надеж дека ќе успееме да ги спасиме животите на нашите момци. Меѓу нив има и тешко повредени, им се укажува лекарска помош, истакна украинскиот претседател Володимир Зеленски во своето обраќање.
Обраќањето на Зеленски го пренесуваме интегрално:
„Завршува 82-от ден од нашата одбрана. Тежок ден. Но, и овој ден, како и сите други, е насочен токму кон спас на нашата земја и нашиот народ.
Во врска со ситуацијата во Мариупол.
Благодарение на дејствијата на украинските војници – Вооружените Сили на Украина, разузнавањето, преговарачкиот тим, Меѓународниот комитет на Црвениот крст и Обединетите нации, ние имаме надеж дека ќе успееме да ги спасиме животите на нашите момци. Меѓу нив има и тешко повредени, им се укажува лекарска помош.
Сакам да нагласам дека украинските херои и се потребни на Украина живи. Ова е нашиот принцип. Мислам дека секој адекватен човек ќе ги разбере овие зборови.
Операцијата за спасување на бранителите на Мариупол ја започнаа нашите војници, разузнавачите. За да се вратат момците дома, работата продолжува, а оваа работа бара деликатност. И време.
Одржуваме максимална дипломатска активност и во други области во интерес на Украина.
Денес разговарав со директорката на ММФ Кристалина Георгиева. За тоа како да се забрза обезбедувањето финансиска помош за Украина, со оглед на државниот буџетски дефицит за време на војната, кој изнесува околу 5 милијарди долари месечно. Се разговараше и за главните насоки на понатамошната соработка.
Во пресрет на состанокот на министрите за финансии на земјите на Г7, овие разговори со директорката на ММФ се директна подготовка за многу важни одлуки за Украина.
Во Кијив работеше висока делегација на Полска. Со нив се одржаа консултации за соработка на ниво на Европската Унија. Тоа особено се однесува на забрзувањето на нашата интеграција во Европската унија и очекуваната одлука за кандидатскиот статус за Украина.
Исто така, работиме на тоа Европската унија да се согласи за шестиот пакет санкции против Русија. Нафтеното ембарго мора да биде дел од него и тоа е во интерес не само на нашата држава, туку и на цела Европа. Благодарен сум им на оние лидери на континентот кои се свесни за ова и помагаат да се промовира соодветно решение.
Се обратив пред студентската заедница на Соединетите Американски Држави – претставници на водечки универзитети. Разговарав исто така и со ректорите и претседателите на овие образовни институции. Клучното прашање е да се вклучат американските универзитети во обновата на нашиот образовен систем по војната. Покрај тоа, разговаравме и за политички прашања, вклучително и за заштита на демократијата, спротивставување на руската пропаганда и лажните вести.
Вооружените Сили на Украина ги задржуваат постојаните напади во оние области каде Русија сè уште се обидува да напредува. Северодонецк и другите градови во Донбас сè уште остануваат главни мети на окупаторите. Правиме се за да ја заштитиме нашата земја и нашиот народ.
Потпишав укази за доделување награди на нашите херои. На 201 воено лице на Вооружените Сили на Украина им беа доделени државни награди. Титулата Херој на Украина му беше доделена на постариот поручник Агасиев Кирил Јашар оглу – командант на вод на 92-та посебна механизирана бригада. И постхумно на потполковникот Јерк Вјачеслав Володимирович, командант на авијациската ескадрила на 40-та тактичка авијациска бригада.“
