За положбата на Бошњаците во Северна Македонија во емисијата Отворено студио на босанската телевизија Хајат, зборуваше Џелал Хоџиќ, новинар и заменик директор на Агенцијата за остварување на правата на заедниците во Северна Македонија.
Како што рече Хоџиќ, Бошњаците денес се многу добро интегрирани во македонското општество.
Тука сум како претседател на СДА на Северна Македонија и среќен сум што сум во БиХ. Бошњаците во Северна Македонија, кои се околу 17.000, ги остварија своите уставни и законски права, се дел од преамбулата на Уставот, додека 28 септември е прогласен за национален празник на Бошњаците во Северна Македонија. Покрај тоа, имаме редакција на јавниот сервис на босански јазик, учениците посетуваат настава на босански јазик, а Парламентот усвои резолуција со која го осудува геноцидот во Сребреница. Можам да кажам дека сме многу добро интегрирани во македонското општество – вели Хоџиќ.
Тој додава дека младата генерација Бошњаци мора да работи на поврзување и зајакнување на меѓусебните контакти.
Многу е важно како народ да сме поврзани со новите начини на комуникација и технологија. Веќе не е важно кој каде живее. На пример, ние во Северна Македонија особено ја следиме телевизијата Хајат и вашата рамазанска програма и на овој начин сме запознаени со сите настани во БиХ. Секоја генерација има своја борба. Новата генерација Бошњаци има обврска да ја подобри меѓусебната соработка со нашите луѓе низ регионот и светот. Наше е да ја разбудиме надежта за подобра иднина. СДА се бореше за зачувување на бошњачката заедница во Северна Македонија. Планот е да се работи заедно со сите други македонски граѓани и народи на развој и проекти од заеднички интерес. Концертот на Дино Мерлин за дочекот на Новата 2020 година во Скопје беше настан за паметење со кој ние како Бошњаци се гордееме, па работиме на реализација на ваква и слична содржина. Имаме многу добра соработка со СДА БиХ, што е многу важно за реализација на нашите планови – истакна Хоџиќ.