Секој и секоја треба да зборуваат за тоа што се случува во Украина за да не се намали вниманието на нашата борба за слобода – рече во своето обраќање, Претседателот на Украина, Володимир Зеленски.
Украинци! Украинки!
Ви посакувам здравје!
Денес беше напорен ден. Ден на важни разговори, важни средби.
На новинарите им го честитав професионалниот празник. За време на војна зборот „празник“ звучи многу неприродно, но на денешен ден секоја година, 6 јуни, се слушаат честитки за луѓето од кои, секако, зависиме сите. Од информациите што ги пренесуваат. Од брзината со која работат.
Се разбира, оваа година не славиме. Но сепак им честитаме. Сепак го забележуваме придонесот на новинарите и новинарките од Украина и на сите оние од кои зависи работата на медиумите: сниматели, инженери, уредници, фотографи, продуценти и сите без кои е невозможно емитувањето и сајтовите нема да работат. Тоа се луѓето кои го чуваат информативниот фронт и на кои сум им благодарен за ова во име на сите нас, сите Украинци.
Денес ги наградив дописниците и медиумите кои сега работат на војната сега. Им доделив награди и на роднините на оние чии животи беа одземени од војната.
Од 24 февруари досега загинаа 32 медиумски работници. Оваа листа вклучува различни биографии, различни лични приказни. И не само на граѓани на Украина. Денес на пригодна церемонија во Кабинетот на Претседателот се сетивме на секој, се сетивме на секоја од нив. Им оддадовме почит со едноминутно молчење.
Денес разговарав со Премиерот на Обединетото Кралство Борис Џонсон. Го информирав за ситуацијата на бојното поле, за нашите можности и клучните моментални опасности, особено во Донбас и во јужните региони на Украина. Благодарен сум му на Премиерот Борис Џонсон за целосното разбирање на нашите потреби и за неговата подготвеност да ѝ обезбеди на Украина оружје што ни е толку потребно за да ги заштитиме животите на нашиот народ.
Разговарав и со полскиот Претседател Анджеј Дуда. Се разбира, за одбранбената поддршка на Украина. Ова е задолжителна тема за сите мои преговори. И јас сум им благодарен на нашите партнери кои дејствуваат брзо и не ги одложуваат своите одлуки. Благодарен сум ѝ на Полска.
Со Анджеј разговаравме и за прашањето за кандидатскиот статус за Украина, што е клучно политичко прашање во моментов. Во наредните недели ја чекаме одлуката на Европската унија во врска со нашето барање за кандидатски статус. Сметам дека тоа ќе биде одлука не само за Украина, туку и за целиот европски проект. За тоа дали има иднина како навистина силно здружение.
Се подготвувам за нов бран обраќања и комуникација со политичките и експертските заедници во светот за да ѝ ја гарантираме на нашата држава поддршката што ни е толку потребна. Ова е постојан процес – зачувување на вниманието и не може да се запре ниту за момент.
И тоа важи за сите, навистина. Секој современ човек добро знае како функционираат медиумите. Многу е тешко да се внимава на една тема долго време. За да не се намали вниманието на Украина, на нашата борба за слобода, секој и секоја мора да продолжат да зборуваат за тоа што се случува. Ве молиме споделувајте информации. Поддржете ги нашите потреби.
Се разбира, тоа пред се се однесува на новинарите. И денес, патем, сакам да им посакам да не се затвораат во нашиот внатрешен украински контекст. Колку повеќе ќе се зборува за Украина во светот, толку побрзо ќе можеме да ја завршиме војната и да ја ослободиме нашата земја.
Се разбира, ова се однесува и на сите претставници на државната и украинската политика. Работете за нашата одбрана – во единство и со полна сила.
Но, не заборавајте дека бизнисот, културата и обичните луѓе можат да направат многу за да ја задржат Украина на врвот на глобалното внимание.
Едноставен пример – денес ми беа поклонети поштенски марки издадени во Шпанија за поддршка на Украина. Се чини што може да промени поштенската марка? Но, тоа е симбол на вниманието на нашата борба што милиони луѓе ќе го видат.
Креирање такви симболи, охрабрување на создавање такви симболи, зборување за Украина и охрабрување разговори за Украина – тоа е она што ќе ни помогне во преговорите со претставниците на државите за специфична важна помош што ѝ е толку потребна на Украина денес.
Нашите херои не ги предаваат своите позиции во Северодонецк. Во градот продолжуваат жестоките улични борби. Лисичанск, Славјанск, Бахмут, Свјатогорск, Авдијивка, Курахове и други области на руски удари се најжешките точки на конфронтација денес.
Руската армија се обидува да распореди дополнителни сили во правец на Донбас, но веќе е 103-тиот ден – а украинскиот Донбас стои. Цврсто стои. Правиме се за одбрана и во насока на Запорижја, и во Миколајив. Благодарен сум на секој и на секоја што го издржуваат силниот притисок на окупаторите и ја бранат нашата држава.
На 17.864 учесници во воени дејствија им беа доделени државни награди на Украина од 24 февруари. Оваа бројка 100% го покажува обемот на херојството на нашиот народ како одговор на инвазијата од големи размери на Русија. Денес потпишав нов указ за наградување на нашите војници. Наградени се 121 воин, од кои 32 постхумно.
Вечен спомен на сите што ги дадоа животите за Украина!
Вечна слава на сите наши херои!
Слава на Украина!
