Битката за Северодонецк е веројатно една од најтешките за време на оваа војна, а особено таму се решава судбината на Донбас – рече во најновото обраќање, претседателот на Украина, Володимир Зеленски.
„Украинци! Украинки!
Сите наши бранители и бранителки!
Пред точно 10 години, на овој ден стартуваше Евро 2012, Европското фудбалско првенство кое ги обедини сите Украинци, Украинците и Полјаците, Украинците и огромното мнозинство Европејци.
Свеченото отворање беше во Варшава, завршната церемонија беше во нашиот главен град Кијив. Натпреварите се одржаа во различни градови од нашите две земји, вклучително во Донецк, во Донбас Арената. Поминаа само 10 години – а се чини дека тоа беше во друг свет.
Токму денес окупаторите ја објавија апсолутно лудата вест дека се подготвуваат да обединат фудбалски клубови од сите окупирани територии во едно псевдо-шампионат – од Донецк, Луганск, Херсон, Мелитопол, Крим, па дури и дел од Грузија. Тоа е само исмевање на окупаторите со луѓето кои добро паметат се.
Пред 10 години нашиот Донецк беше силен, горд и развиен град. А потоа дојде Русија. Донесе токму толку несоодветно ниво на идеи. И сега тоа е град на духови што ги загуби повеќето луѓе, илјадници животи и апсолутно сите перспективи.
Само враќањето на Украина, што дефинитивно ќе се случи, само нашето знаме и само украинскиот закон ќе значи нормален живот за овие територии, за овие градови повторно. Животот што беше таму. Мирно, безбедно, отворено за светот. И секако – нови натпревари на тимови од светска класа во Донбас Арената.
Благодарен сум му на Претседателот на Полска Анджеј Дуда и пријател на сите Украинци, за тоа што сега замина на специјално патување во европските земји за да ја поддржи европската перспектива на нашата земја. Овој јуни треба да добиеме одлука за кандидатурата. И сите наши пријатели, сите наши дипломати сега работат за ова, работат со полна пареа.
Со Анджеј требаше да оди и Претседателката на Словачка, Зузана Чапутова – беше планирана ваква заедничка иницијатива на двајцата лидери. На која ѝ попречи позитивен тест за Ковид. Па, такви се условите на нашиот живот сега. На Зузана ѝ посакувам брзо закрепнување.
Денес разговарав со германскиот Канцелар Шолц. Исто така – за одлуката во корист на Украина за кандидатурата, што, всушност, ќе биде одлука во корист на Европа. Зборувавме за поддршка во одбраната. И за безбедноста на храната, гарантирањето што е навистина глобален интерес. Затоа што никој не може да биде заинтересиран, освен руската држава, за глобалната прехранбена криза.
Денес им се обратив на учесниците на инвестициската конференција организирана за дискутирање на економските перспективи на нашата држава. Меѓу учесниците имаше и претставници на најголемите светски фондови. Иако настанот не беше јавен, сепак беше многу важен и моќен. Ги поканив да инвестираат во Украина. Инвестирајте.
Разговарав и со членовите на заедницата на лидери на големите американски компании. Ова е 133-ти ваков самит, а оваа година ги собра водечките сили на глобалниот бизнис. Разговаравме за тоа како бизнисот може да ѝ помогне на Украина да преживее. Ги повикав да се повлечат од рускиот пазар и да не ја поддржуваат оваа војна со своите даноци.
За мене е многу важно да видам дека во таква публика – и ова, уште еднаш ќе нагласам, се претставници на највлијателниот дел од американскиот бизнис – сметаат дека санкциите против Русија треба да се зајакнат. Затоа, правилно би било политичарите да го слушнат овој став. Водечките бизниси и мнозинството во американските и европските општества сметаат дека сè уште нема доволно притисок врз Руската Федерација за да ја прекине оваа војна.
Според резултатите од овој период, 105-тиот ден од војната во полн обем, Северодонецк останува епицентарот на конфронтацијата во Донбас. Ние ги браниме нашите позиции, му нанесуваме значителни загуби на непријателот.
Ова е многу жестока битка, многу тешка. Веројатно една од најтешките во текот на оваа војна. Благодарен сум му на секој и на секоја што бранат во оваа насока. На многу начини таму се решава судбината на нашиот Донбас.
Потпишав исто така укази за доделување награди на нашите херои. На 285 учесници во воените дејствија им беа доделени државни награди, од кои 68 постхумно.
Вечен спомен на сите што ги дадоа животите за Украина!
Вечна слава на нашите херои кои ја бранат државата!
Слава на Украина!“, рече Зеленски.
