Од почетокот на оваа инвазија, украинските службеници за спроведување на законот прават се што е потребно за да се евидентираат злосторствата на окупаторите и да се соберат докази. Нашите партнери од многу земји се вклучени во оваа работа. Рускиот терор одамна ја премина границата над која за многумина во цивилизираниот свет стана очигледно дека е прашање на глобална безбедност да се казни Русија, терористичка држава, за се што таа направи против Украина и меѓународниот правен поредок, изјави украинскиот претседател Володимир Зеленски во своето обраќање.
„Денес цел ден добивам пријави од градот Часив Јар во Доњецката област. Таму е во тек спасувачка операција по рускиот напад на станбени згради. Уништени се две висококатници. Десетици луѓе се под урнатините. Шестмина беа спасени. На списокот на загинати има 15 имиња и, за жал, ова не е конечната бројка.
Тоа беше ракетен напад. И секој што дава наредби за такви напади, секој што ги извршува во нашите обични градови, во населени места, убива апсолутно намерно. По ваквите удари, убијците нема да можат да кажат дека нешто не знаеле или нешто не разбрале… Сите што го изведоа ова гранатирање, други ракетни напади, сите што вршат напади врз нашите градови со ракетна артилерија, како во Харкивската област, во Запорижја, како и во Кривиј Риг, како и Сиверск и Вугледар во Донецката област – сите тие ќе бидат пронајдени.
Знаете, нацистичките убијци се наоѓаат и судат дури и кога имаат по 90 или 100 години. Тие ги фаќаат низ целиот свет. Се разбира, не сакаме да чекаме толку долго. Но, го давам овој пример за да покажам дека казната е неизбежна за секој руски убиец. Апсолутно за секој. Исто како и за нацистите. И нека не се надеваат дека нивната држава ќе ги заштити. Русија ќе биде првата што ќе ги напушти кога ќе се променат политичките околности.
Од почетокот на оваа инвазија, украинските службеници за спроведување на законот прават се што е потребно за да се евидентираат злосторствата на окупаторите и да се соберат докази. Нашите партнери од многу земји се вклучени во оваа работа. Рускиот терор одамна ја премина границата над која за многумина во цивилизираниот свет стана очигледно дека е прашање на глобална безбедност да се казни Русија, терористичка држава, за се што таа направи против Украина и меѓународниот правен поредок.
Во мојот распоред за следните недели има токму таквите преговори и обраќања кои ќе придонесат за враќање на правдата, ќе придонесат за казнување на руските воени злосторници. Покрај тоа, оваа активност е насочена не само кон Европа и другите традиционални региони за работата на украинската дипломатија. Ќе сториме се за и Латинска Америка, Азија и Африка да ја слушнат вистината за рускиот терор на нашата земја.
Во изминатата недела многу се зборуваше за наводна „оперативна пауза“ во дејствијата на окупаторите во Донбас и другите делови на Украина. 34 воздушни напади на руски авиони во еден изминат ден е одговор на сите оние кои ја измислија оваа „пауза“. Украинската армија се држи, цврсто се држи и одбива напади во различни насоки. Но, се разбира, треба уште многу да се направи за руските загуби да станат такви после кои навистина ќе има пауза. Згора на тоа, пауза не пред нови офанзиви на окупаторите, туку пред нивното бегство од нашата украинска родна земја. И јас сум им благодарен на сите наши борци кои се грижат за тоа ова време да се приближи.
Тоа е неизбежно како и казната за окупаторите. Но, ние мора да се држиме, мораме да се бориме заедно на сите фронтови сега – на политичкиот, информативниот и економскиот фронт, без никаде да покажеме слабост. Оваа војна можеме да ја издржиме само заедно – апсолутно сите, секој Украинец, секоја Украинка.“
