Министерот за земјоделство, шумарство и водостопанство Љупчо Николовски, кој претстојува во посета на Словенија, оствари средба со словенечката министерка за земјоделство шумарство и храна Ирена Шинко со која разговарал за унапредување на билатералната соработка преку реализација на проекти од Акцискиот план за соработка меѓу двете министерства.
Текстот на Акциониот план за соработка 2021-2024 е потпишан во ноември 2021 година, за време на 15. Министерски состанок во Тирана и опфаќа активности за поддршка на здруженија на млади земјоделци, рурално кредитирање, словенечко искуство во кофинансирање на ИПАРД проекти, потреби за формирање гарантен фонд и имплементација на нови рурални кредитни модели, како и размена на практично искуство за примена на агроеколошки мерки, размена на искуства за воспоставување информациски систем за земјоделско знаење – АКИС и друга соработка.
Двајцата министри, како што соопшти Министерството за земјоделство, шумарство и водостопанство, размениле мислења и за стручната поддршка од Словенија во процесот на преговори за членство на Северна Македонија во ЕУ.
– Република Словенија обезбедува значајна техничка поддршка за приближување на законодавството на ЕУ во областа на земјоделството и руралниот развој. Словенечки експерти и консултантски фирми учествуваа во голем број проекти финансирани од ЕУ во рамките на ИПА и Твининг проекти и други проекти од донатори (ФАО). Исто така, Република Словенија обезбедува значителна поддршка и во рамките на Билатералната програма за Северна Македонија, преку која беа спроведени голем број активности насочени кон зајакнување на административниот капацитет на македонските институции (МЗШВ, Платежна агенција, Агенцијата за поддршка на развојот на земјоделството, итн.), се наведува во соопштението од МЗШВ.
Министерот Николовски ќе учествува и на 60. издание на Меѓународниот саем за земјоделство и храна AGRA FAIR 2022, што се одржува во Горна Радгона.
Во рамки на саемот, Северна Македонија ќе има организирана презентација на национален изложбен простор од областа на земјоделството и економијата. Ќе бидат презентирани и можностите за инвестирање во развој на бизниси, особено продлабочување на соработката со Словенија, но и соработката со соседните земји и земјите од регионот./МИА/
