Новоизбраната британска премиерка Лиз Трaс, во својот прв официјален говор по преземањето на премиерската функција, вети дека ќе го спаси Обединетото Кралство од бурата и најави дека нејзините три приоритети ќе бидат економијата, енергетската криза и јавното здравје, јави МИА.
Трас се обрати од пред Даунинг стрит 10 по враќањето од Шкотска, каде што беше официјално назначена на функцијата од страна на британската кралица Елизабета Втора.
Таа вети раст на економијата и давање приоритет на производите од Обединетото Кралство, но призна дека земјата се соочува со предизвици произлезени од пандемијата на Ковид-19 и војната во Украина.
Велика Британија ја доживува најголемата ценовна криза во изминатите децении. Инфлацијата е над 10 проценти, а цените на енергенсите растат и за бизнисите и за домаќинствата.
Прво ќе ја натерам Британија повторно да работи. Имам храбар план за економски раст преку даночни намалувања и реформи. Ќе ги намалам даноците за да ја наградам напорната работа и да го поттикнам растот и инвестициите предводени од бизнисот. Ќе испорачам реформи за мојата мисија да постигнам Обединетото Кралство повторно да работи, да гради и повторно да расте, истакна премиерката.
Таа увери дека ќе ги вложи сите можни напори за да се осигура дека луѓето не мора да плаќаат сметки за енергија што не можат да си ги дозволат. Трас, исто така, вети дека ќе изгради болници, патишта, училишта и широкопојасен интернет пристап.
