Украина функционира и во време на воена инвазија од Русија. Украинските власти се обидуваат да ги сервисираат своите граѓани во добивањето социјална и економска поткрепа од државата. Функционира и образованието. Истовремено со помош на сојузниците и меѓународните организации украинските граѓани добиваат соодветна медицинска заштита и вакцинација од Ковид-19.
Пензии и обука за згрижувачки семејства
За периодот на воена состојба, Владата на Украина идентификувала дополнителни можности за добивање пензии или парична помош во деокупираните територии и во заедниците лоцирани во областите на воените дејствија. Финансирањето на пензиите на привремено окупираните територии не престана, информираат во извештај за социјалната сфера украинските власти.
Како што наведуваат, во услови кога не работат банките Владата ја одобрила одлуката жителите на деокупираните територии, на кои плаќањата им се припишуваат на картичката, да можат да добиваат пензии во готово преку Украинската пошта.
„Стартува нова програма за обука на згрижувачи, старатели, посвоители во Украина. Развојот на семејните форми на воспитување, секое дете без родители, дете оставено без родителска грижа, да се воспитува во семејство, традиционално е приоритет на Министерството за социјална политика. Токму сегаво време на војната, кога уште повеќе деца имаат потреба од заштита и поддршка, важно е да се зајакне и забрза обуката на згрижувачите и посвоителите. Обуката на обучувачите според новата програма започна на 13 септември во рамките на проектот „Следење на потребите и поддршката на децата во услови на војна“ со поддршка на УНИЦЕФ Украина“, се наведува во извештајот.
Медицинска и хуманитарна помош и вакцинација
Властите информираат дека 6 станици за кислород и друга важна медицинска опрема добија болниците во Прикарпатија. Оттаму прецизираат дека од почетокот на годината, покрај критично важните кислородни станици, до медицинските установи во Прикарпатија е доставена и голем број опрема, меѓу кои 1 ангиограф, 5 мобилни и 4 стационарни рендген апарати, 2 електрокардиографи, 5 капнографи итн.
„400.000 дози од вакцината Comirnaty/Pfizer беа доставени во Украина како дел од COVAX. На 18 септември 2022 година, УНИЦЕФ испорача 400.000 дози од mRNA вакцината против COVID-19 Comirnaty произведена од Pfizer-BioNTech во Украина како дел од меѓународната иницијатива COVAX. Посебна карактеристика на оваа серија на Comirnaty/Pfizer-BioNTech вакцина е тоа што не треба да се разредува со солен раствор. Веднаш е подготвена за употреба, вакцината треба само да се одмрзне пред инјектирање. Ова ја поедноставува работата на медицинските работници. Во Украина, беше дозволена втора засилувачка доза за сите оние кои сакаатда се вакцинираат и шемите за вакцинација беа ажурирани. Министерството за здравство одобри наредба за воведување важни промени во вакцинацијата против Ковид-19. Втората бустер доза е дозволена за сите возрасни со интервал од најмалку 4 месеци по првата бустер доза. Дополнително, одобрени се нови распореди за вакцинација во согласност со препораката на СЗО, ЕМА и ЕЦДЦ, Националната техничка експертска група за имунизација.“, јавуваат украинските власти.
Министерството за здравство на Украина добило хуманитарна помош: вакцини против полиомиелитис, тетанус и дифтерија.
И покрај фактот што војната во Украина продолжува веќе седми месец, многу странски партнери повторуваат дека ќе ја поддржуваат Украина до победа, се наведува во извештајот.
„За тоа сведочи континуираното давање медицинска хуманитарна помош. која овој пат дојде од владината агенција за стратешки резерви на Полска, од компаниите Баер и Мерк, како и од УНИЦЕФ. Треба да се напомене дека споменатите институции редовно даваат поддршка во форма на лекови и опрема. Конкретно, добиено е следново: 600.000 дози вакцина против детска парализа; 70.000 дози вакцина против тетанус и дифтерија; 10 системи за телемедицина (In Touch Health); 30 фрижидери; 146 палети витамински комплекси; низа антивирусни агенси за системска употреба“, нагласуваат од Министерството за здравство на Украина.
Образование
Во октомври, како што информираат, Украина ќе учествува во главната фаза на меѓународната студија за квалитетот на образованието ПИСА-2022.
„Соодветната одлука е одобрена со налог на Министерството за образование и култура. Математиката ќе биде водечка гранка на циклусот ПИСА-2022, а креативното размислување ќе биде дополнителна иновативна гранка. За Украина, овој циклус ќе биде посебен и со оглед на фактот дека за прв пат ќе спроведеме компаративна студија од големи размери во компјутерски формат. Во примерокот беа вклучени оние образовни институции идентификувани од меѓународната агенција „Вестат“. Резултатите од ПИСА-2022 ќе бидат претставени на светската заедница во декември 2023 година.
Подготви: Ј. Ѓорѓиоски
