Библиотеката на МСУ-Скопје е збогатена за уште еден значаен домашен наслов, а тоа е публикацијата насловена „ЗБОРУВА АКТО! 2006-2020“ / AKTO SPEAKING! 2006-2020, на македонски и англиски јазик, посветена на фестивалот АКТО, кој ја афирмира независната култура, известуваат од Музејот на современа уметност Скопје.
Промоцијата се одржа во Музејот на современа уметност на 29 октомври 2022 година, а промотори беа Елизабета Шелева, Биљана Тануровска – Ќулавковски и Владимир Јанчевски.
Публикацијата „ЗБОРУВА АКТО! 2006-2020“ која ја објави Факултет за работи што не се учат – ФРУ, од уредниците Филип Јовановски и Ивана Васева е замислена како еден вид архива во форма на книга. И покрај нејзиниот обем, на 700 страници и огромен визуелен материјал, таа не претендира да биде конечната архива или заокружен поглед за АКТО. Оваа публикација е визуелен, личен и политички есеј за тоа што е АКТО, како и за условите во кои е создаван АКТО, како документ што постојано треба да потсетува на значењето на архивирањето.
Посетете ја Библиотеката на МСУ-Скопје, каде ќе можете да дознаете повеќе за фестивалот АКТО, за неговата историја, како и големиот број учесници на многу претходни изданија чии текстови и прилози се застапени и во ова издание.
