„Нашата цел не е на тие скрининзи да ја разубавуваме реалноста, ниту да презентираме со розови очила. Целта е да ги истакнеме достигнувањата, напорите и успесите кои се реално направени, но и да ги покажеме слабостите кои се обврзуваме да ги поправиме во текот на преговорите“ изјави вицепремиерот за европски прашања, Бојан Маричиќ во интервју за „Фронтлајн“.
Тој додаде дека токму тоа е и целта на преговорите, затоа и тие траат со години за да има време и простор да се надминат сите слабости и недостатоци.
„Не може да ги скриеме слабостите на системот, државата или општеството. Имаме извештаи на Европската комисија секоја година, тие ја знаат реалната состојба. Затоа настапуваме реално и искрено, за заедно да направиме план како тоа да се смени“ рече Маричиќ.
Вицепремиерот кажа дека токму надминувањето на слабостите и проблемите е во интерес на граѓаните и побара притисок и поддршка од нив за да се сменат работите.
„Важно е процесот на пристапување кон ЕУ и ЕУ како структура да останат популарни меѓу народот, бидејќи само така ќе имаме поддршка за менување на работите“ рече Маричиќ.
