Германија утрово ја разбуди масивна полициска акција. Уапсени се 25 припадници на домашна ултрадесничарска и терористичка организација во рација ширум Германија, рано утрото денеска. Во полициската акција учествуваа 3.000 припадници на полицијата во 11 сојузни држави, каде што беше извршен претрес на 130 локации. Една поранешна парламентарка (во мандатот 2017-2021 година) од ултрадесничарската партија АФД е меѓу уапсените. Двајца се уапсени надвор од границите на Германија – во Италија и Австрија, пренесува Цивил Медиа.
Властите не го соопштија името на организацијата, но нагласија дека мрежата е дел од пошироко ултрадесничарско движење кое имало конкретен план за насилно соборување на германската држава и поставување нова влада.
Германското федерално обвинителство и германскиот министер за правда, Марко Бушман соопштија дека акцијата е дел од голема истрага насочена против осомничена терористичка мрежа со познати врски со движењето Рајхсбиргер (Reichsbürger – граѓани на Рајхот) и со американското ултрадесничарско движење QAnon. Министерот Бушман рече дека рациите биле извршени врз лица осомничени дека планирале вооружен напад врз државни институции.
„Од утрово се одвива голема антитерористичка операција. Федералниот јавен обвинител истражува осомничена терористичка мрежа од местото на настанот Рајхсбиргер. Постои сомнеж дека бил планиран вооружен напад врз уставни органи“ – напиша Министерот Бушман на Твитер.
Многу од уапсените имале воена обука, а меѓу нив имало и поранешни германски војници, вклучително и од армијата на поранешна Источна Германија, а се знаело дека биле тешко вооружени со оружје стекнато нелегално. Групата најверојатно била формирана кон крајот на 2021 година, велат обвинителите.
Меѓу уапсените има и едно лице што направило обиди да стапи во контакт со претставници на руската влада во врска со плановите, се наведува во соопштението на федералниот обвинител, но нема индиции дека добиле позитивен одговор од руските извори со кои контактирале.
Руски државјанин, кого обвинителите го идентификуваа како „Виталиј Б.“, е под „силно сомнение“ дека ги поддржувал заговорниците и дека се обидел да воспостави контакти со Москва.
Групата вклучува луѓе кои учествуваа во демонстрациите против Ковид карантинот и биле целосно под влијание на теориите на заговорот, соопштија властите.
Целта на терористичката група беше „да се урне постојниот државен поредок во Германија и да се воспостави нов сопствен облик на држава, чиишто контури се веќе разработени,“ при што било предвидено користење воени средства и насилство врз државните претставници, се вели во соопштението на обвинителите.
Плановите на групата вклучуваат и вооружен напад врз зградата на германскиот парламент, Рајхстагот, соопштија обвинителите. Членовите на терористичката група, исто така, формирале и влада во сенка што имале намера да ја инсталираат доколку нивните планови бидат успешни.
„Членовите на организацијата беа свесни дека оваа цел може да се постигне само со употреба на воени средства и насилство врз државните претставници. Ова вклучува и нарачување убиства“ – се вели во соопштението на обвинителството.
Подготви: Дескот на ЦИВИЛ
