Министер во Кабинетот на израелскиот премиер Бенјамин Нетанјаху предложи од религиозни причини да им се дозволи на израелските лекари да одбијат третман на ЛГБТК пациенти.
Новата министерка за национални мисии, Орит Струк од Верската ционистичка партија, контроверзната изјава ја даде при гостување во радио-програма. Таа посочи дека лекарот може да одбие да лекува пациент доколку тоа ги нарушува неговите религиозни убедувања „се додека има доволно други лекари кои можат да ја пружат оваа услуга“.
Таквиот став дополнително ги зајакна стравувањата дека новата влада ќе претставува закана за правата на хомосексуалците во Израел.
Израелскиот претседател, Исак Херцог, ја осуди растечката анти-ЛГБТК реторика во неговата земја.
„Расистичките изјави во последните денови против ЛГБТК заедницата и другите делови од јавноста ме прават крајно загрижен“, рече Херцог. Претседателот кој има главно церемонијална функција, додаде дека таквата реторика ги поткопува израелските „демократски и морални вредности“.
Премиерот Нетанјаху ги нарече „неприфатливи“ забелешките на идниот министер и ги отфрли тврдењата дека неговата нова Влада ќе претставува закана за правата на хомосексуалците.
Сепак, критичарите предупредуваат дека Нетанјаху е премногу слаб за ефективно да ги контролира своите ултра-националистички и ултраортодоксни коалициски партнери кои се обидуваат да протуркаат закони што се во согласност со она што тие го сметаат за божествено религиозно наследство, пишува „Гардијан“
