Во пресрет на првата годишнина од руската инвазија, Украина и Русија лобираат меѓу земјите во ОН за поддршка пред гласањето на Генералното собрание од 193 члена, за кое САД рекоа дека „ќе влезе во историјата“.
Генералното собрание се очекува денеска да усвои резолуција предложена од Украина и нејзините поддржувачи, во која се нагласува „потребата да се постигне што поскоро сеопфатен, праведен и траен мир“ во согласност со Повелбата на ОН.
„Ќе видиме каков е ставот на народите во светот по прашањето за мирот во Украина“, изјави на Генералното собрание американската амбасадорка во ОН Линда Томас-Гринфилд.
Генералниот секретар на ОН Антонио Гутереш ја осуди руската инвазија и нагласи: „Сите членки на организацијата ќе се воздржат во нивните меѓународни односи од закана со сила или употреба на сила против територијалниот интегритет или политичка независност на која било држава или на кој било друг начин некомпатибилен со целите на Обединетите нации“.
Нацрт-резолуцијата на ОН, што е необврзувачка, но има политичка тежина, го повторува минатогодишното барање на Генералното собрание Москва да ги повлече своите трупи и да ги прекине непријателствата. Русија го оквалификува текстот како „неизбалансиран и антируски“ и ги повика државите да гласаат против него.
