Премиерот Димитар Ковачевски во обраќањето пред пратениците кажа дека е заокружен процесот на реконструкција на Владата преку изборот на нови министри.
-Конкретно, денес имаме можност, шанса, јас би рекол обврска да креираме подобра, поуспешна и поефикасна Влада која целосно ќе продолжи да ги реализира поставените цели и задачи. Да добиеме Влада која на вистински и успешен начин ќе продолжи да ги решава проблемите на граѓаните, која ќе генерира и покажува успех. И веднаш на почетокот, сакам јасно и прецизно да констатирам кој ќе биде идентитетот и карактеристиките на новата Влада – стабилност, ефикасност, успешност, работа, чесност, европски фронт, европска Македонија, европска перспектива, кажа Ковачевски.
Според него, сега Владата ќе има дополнителен елан, поддршка и полн и цврст капацитет.
-На сите ни е јасно дека живееме во време-невреме! Во време на целосна европска безбедносна, енергетска и инфлаторна криза. За мене и за Владата, токму во вакво време се покажува и докажува кого го бива, кој мисли и работи за граѓаните, кој може да овозможи стабилност и раст. Да, тоа е клучно. Бидејќи, и граѓаните и бизнисот, сите, сакаат и бараат стабилност, извесност, предвидливост. Сите ние сакаме да видиме секој ден дека државата и во вакви невидени услови, функционира, ги остварува своите основни функции, но и поважно креира раст и развој, истакна премиерот.
Тој додаде дека ова е време во кое се бориме и внатре и надвор, со објективните проблеми, но и со факторите кои посакуваат државата да стагнира, да уназадува, да пропаѓа.
-Да, ова е јасна борба на две стварности, на две насоки, на две доминантни структури. Првата, ја застапувам и предводам јас, како премиер, како најодговорен. Јас, ние, Владата сме на страната на прогресивното. На патот на чесно, макотрпно, посветено и фокусирано решавање на старите и новите проблеми, на напластените историски проблеми и новите предизвици. Со разум, со знаење, со добра верба, со чесност, со визија и насока кон заедничкото Европско семејство. Со почит и целосна заштита на традицијата, на македонскиот вековен ќ цврст национален, јазичен и културен идентитет и посебност, како начи темели за постоењето порано, сега и засекогаш. И со политики на градење на пријатели во регионот и во Европа, и со профилирани политики за единство, обединетост и работа за европски стандарди, за подобра економија, за подобар животен стандард, за борба против криминалот и корупцијата, за воведување и постоење на ред и поредок во државата на сите нивоа. Јас тоа го ветив пред една година, за тоа работев со мојот тим, и од тоа нема да отстапам за било што, за било кого и било кога! И како Премиер, и како граѓанин, и како човек кој со своето семејство бил и ќе остане во Македонија, нагласи Ковачевски.
