Во последниот, одлучувачки натпревар на македонската репрезентација против Норвешка, за пласман во третата и последна квалификациска фаза за пласман на ЕП во кошарка кое што во 2025 година ќе се одржи во Финска, Латвија, Полска и Кипар, нашите кошаркари со сигурна игра во текот на целиот натпревар извојуваа победа со резултат од од 79-41. Со тоа Македонија заврши на првото место во силната „А“ група, во којашто противници ни беа Норвешка, Словачка и Данска.
Нашите репрезентативци со респект кон противникот влегоа во овој натпревар, особено по победите на Норвешка против Данска со 24 поени и особено победата во гости против Словачка со 19 поени разлика. Пред денешниот натпревар меѓу Македонија и Норвешка, Словачка извојува победа во гости против Данска и со тоа победа против Норвежаните стана императив. Нашите кошаркари беа подобри во текот на целиот натпревар, а најдобар, според очекувањата, беше Американецот, и натурализиран Македонец, Ти Џеј Шортс. Тој постигна вкупно 27 поени, а имаше и 6 скокови, 5 асистенции и шут од поле 61.54%. Освен него, со одлична игра денеска се истакна и Војдан Стојановски со постигнати 20 поени, 5 скока и 2 украдени топки.
Нашата репрезентација на последните два натпревара играше без нашиот најдобар кошаркар Ненад Димитријевиќ – Нено, поради напреварите што ги имаше неговиот тим Уникс Казан во ВТБ лигата. Отсуствуваше и големата македонска надеж Андреј Јакимовски, поради неговите обврски со тимот на универзитетот Вашингтон Стејт којшто се натпреварува во американската НЦАА лига.
Во третата и последна фаза од квалификациите, вкупно 32 тима од Европа ќе се натпреваруваат во 8 групи, а од секоја група по три првопласирани репрезентации ќе изборат пласман на завршниот „Евро-баскет 2025“.
А. Лукароски
