Руски блогер затворен поради, како што велат руските власти, „ширење дезинформации за вооружените сили“, изјави за Скај њуз дека „Русија не е Путин“. Дмитриј Иванов е осуден на повеќе од осум години затвор за објавување содржина на протестниот канал на социјалната мрежа Телеграм за студенти на Московскиот државен универзитет.
Пред изрекувањето на пресудата, Иванов за Скај њуз изјави дека „Русија не гласала за Владимир Путин“ и дека „тој не ги прашал Русите што мислат за започнување војна со нивните најблиски соседи“.
Десетици милиони луѓе овде во Русија се против оваа криминална војна. Многумина од нас имаат пријатели и роднини во Украина и ја чувствуваме нивната болка. Оваа војна е голема трагедија за народот на Украина, како и за Русите кои сакаат мир со нивните соседи, истакна 23-годишното момче.
Блогерот, кој беше приведен во јуни минатата година, пред судот изјави дека останува на неговите првични изјави, за кои смета дека се фактички точни. Неговата мајка, Елена Стромскаја, рече дека луѓето му пишувале на Дмитриј од различни земји како Централна Азија, Грузија, Ерменија, па дури и Велика Британија, и дека тој морал да даде некои писма бидејќи веќе немал каде да ги стави.
Таа додаде дека е горда на својот син: „Горда сум што се држи, што не може да се скрши и што продолжува да се бори“.
Освен затворската казна, на Иванов му е забрането четири години да врши должност на администратор на интернет или на социјалните мрежи, изјави неговата адвокатка Марија Ајсмонт. Тој е обвинет дека напишал или повторно објавил серија наводи на Телеграм за однесувањето на руската војска во Украина, вклучително и наводи за воени злосторства.
Случајот на Дмитриј Иванов е уште една демонстрација на бруталната репресија на антивоено несогласување од страна на руските власти. Тоа покажува дека секој што тврди дека руските сили извршиле воени злосторства, ќе плати за тоа со години зад решетки, реагираше Наталија Звијагина, директорка на Амнести интернешнал за Русија.
Според неа, „судството повеќе не се обидува да одржи ни најмал изглед на непристрасност. И обвинителот и судијата ги третираа изјавите на руските функционери како фактички и вистинити, за кои не беше потребна независна проверка. Сè што им противречи беше отфрлено како лажна информација“.
Дмитриј Иванов е затвореник на совеста. Тој и сите обвинети и осудени за говорење против руската инвазија на Украина треба веднаш и безусловно да бидат ослободени, а сите обвиненија против нив да бидат отфрлени. Актите со кои се криминализира критиката за руската инвазија на Украина треба да се укинат како кршење на правото на слобода на изразување, нагласи Звијагина.
„Дискредитирање“ на војската во Русија се казнува со затвор до пет години, додека намерното ширење лажни информации може да резултира со казна затвор од 15 години.
Г.Т.
