Четири дена пред претседателските избори во Црна Гора, медиумите го објавија заклучокот на Европскиот парламент дека ЕУ и САД би можеле да играат посредничка улога во Црна Гора, како што правеа некогаш во Северна Македонија, што ќе има за цел да ги намали политичките тензии, функционирање на институциите и решавање на политичката криза.
Овој заклучок произлегува од дискусијата што се одржа вчера во Европскиот парламент, пишува денеска подгоричкиот портал „Дан“ во текстот под наслов „Пицула и Борел планираат македонско сценарио за Црна Гора?“.
За време на седницата на Европскиот парламент во Стразбур, имено, известувачот на ЕП за Црна Гора, Тонино Пицула, го прашал специјалниот пратеник за надворешна политика, Жосеп Борел, до кој степен САД се вклучени во решавањето на политичката нестабилност во Црна Гора, борбата против дезинформациите и надворешното влијание и обидите за Црна Гора да се врати на реформите.
Според извештаите, Пицула го прашал високиот претставник дали заедничкото посредување меѓу ЕУ и САД, слично на заедничкото посредување на „Пржинскиот договор“ во Северна Македонија, може да биде опција за Црна Гора. Борел посочил дека координацијата со САД се сведува на борба против дезинформациите и дека засега нема заедничко посредување.
„Можеме да го направиме тоа заедно со САД, зошто да не, соработуваме исклучително добро со нив во дијалогот меѓу Косово и Србија, многу ефикасно, а истото беше случај и со Северна Македонија. Тоа можеме да го направиме во случајот со Црна Гора. Моментално се работи на координација која вклучува борба против дезинформациите, но нема заедничко посредување меѓу САД и ЕУ, се уште не постои, но ќе ја искористам приликата да истакнам колку е важна соработката што ја имаме во решавањето проблемите меѓу Косово и Србија“, рекол Борел пред пратениците во Европскиот парламент.
Во секој случај, сегашната ситуација во Црна Гора има сличности со онаа во Северна Македонија во 2015 година, пишува „Дан“ и истакнува дека политичката криза кулминирала кога било утврдено дека над 20.000 граѓани биле незаконски прислушувани и дека режимот ограбил над пет милијарди од јавните фондови. Македонија беше на работ на граѓанска војна, па дојде интервенцијата на Европската Унија и Соединетите Американски Држави и со силен притисок ги принудија сите поголеми политички сили да седнат на иста маса и да се договорат за одржување на вонредни парламентарни избори, кои беа одржани 100 дена по договорот.
Потсетуваат дека пржинскиот договор подразбирал формирање техничка влада на 100 дена пред изборите, а на опозицијата и биле гарантирани местата министер за внатрешни работи и министер за државна администрација, како и заменици министри во клучните државни ресори.
Поранешниот македонски премиер Зоран Заев доби силна меѓународна поддршка, што доведе до потпишување на Договорот за добрососедски односи со Бугарија, донесен е законот за подобрување на употребата на јазиците на другите етнички заедници, а беше потпишан и спроведен Договорот од Преспа со Грција.
Тоа резултираше со деблокирање на евроатлантските интегративни процеси. Беше завршена значајна политичка работа, како што е бришењето на дури 330.000 гласачи од избирачкиот список, а беше воспоставена и соодветна медиумска регулатива. Обезбеден е еднаков пристап и третман во медиумите за сите политички субјекти кои учествуваат во изборниот процес наместо целосна медиумска хегемонија.
Така, се променија политичките, дипломатските и пошироките социјални парадигми во Северна Македонија. Тогашниот претседател на Социјалдемократската партија, Ранко Кривокапиќ, уште во 2017 година изјави дека по бојкотот на парламентот и големата политичка криза, Зоран Заев стана премиер и дека на Црна Гора и треба „македонско сценарио“ што ќе доведе до промена на власта.
Заев, пак, пред пет години изјави дека Црна Гора е стабилна земја, лидер на евроатлантските интеграции во регионот и дека е невозможно да се спореди политичката криза во Македонија која и претходеше на неговата изборна победа со актуелната политичка ситуација во Црна Гора. Очигледно е дека во Црна Гора има големи негативни промени и дека ЕУ и САД се подготвуваат да ги „привлечат“ црногорските политички елити, пишува Танјуг.
