Министерството за труд и социјална политика, ги демантираше изнесените невистини на прес-конференција од страна на членови на ВМРО-ДПМНЕ, во врска со директорката на ЈОУДГ „Естреја Овадија Мара,“ Битола.
„Квалитетот на професионалните компетенции, работната етика и почитувањето на законите се условите кои мора да бидат исполнети од страна на раководните лица поставени од Министерството за труд и социјална политика, предводено од министерката Јованка Тренчевска.
Извршувањето на работните задачи, почитувањето на редот и дисциплината на работното место, не може да се израмни со мобинг. Оттука, лаги се и изнесените наводи за мобинг на работно место.
Директорката на ЈОУДГ „Естреја Овадија Мара,“ Битола, во случај со пензионирана вработена како дел од техничкиот персонал, до вработување на нов работник на истата позиција ја искористила можноста, истовремено почитувајќи ги законските прописи, врз основа на потпишаниот анекс на договор за вработување да ја распореди вработената за вршење на работа од едно на друго работно место кое одговара на нејзиниот степен на стручна подготовка, во рамките на работното време.
Грижата за децата и обезбедувањето на нивени правилен раст и развој во процесот на предучилишното воспитание и образование е приоритет на Министерството за труд и социјална политика. Продолжуваме да вложуваме во квалитетно предучилишно воспитание и стручен кадар кој е на ниво на задачите и професионалните компетенции“, се вели во демантот.
„По назначувањето, директорката на јавната општинска установа, детска градинка „Естреја Овадија Мара“ во Битола – Лидија Тфирст Митревска тргнува во контраофанзива против сите вработени за кои мисли дека се против неа и против нејзината партија Социјалдемократскиот сојуз, злоупотребувајќи ја својата партиска моќ и блискост со министерката Тренчевска, лечејќи ги своите лични и партиски фрустрации, секојдневно врши мобинг и реваншизам врз вработените. Вработените се обидуваат да се заштитат преку синдикалната организација, но и самиот Синдикат е подложен на притисоци и закани“.
Ова на прес-конференција го изјави Лидија Малинковска, член на централна Комисија за труд и социјална политика на ВМРО-ДПМНЕ.
Малиновска рече дека „како круна на своеволното и незаконито однесување таа спротивно на Хасап стандардите, ги присилува дел од вработените кои работат во кујна, во ист ден да извршуваат работни задачи во кујна и да чистат тоалети со истата облека, со што директно се загрозува здравјето на децата“.
„Своеволното однесување на директорката и незаконското работење продолжува и понатаму и вршењето притисоци и мобинг резултираат со малтретирање на вработените кои се вознемирени, им се загрозува здравјето и се приморани да го напуштат работното место и да побараат лекарска помош. При обидот да се побара заштита од синдикалната организација директорката продолжува со уцени и закани, демонстрирајќи сила и моќ над вработените, со поддршка на министерката Тренчевска на која постојано се повикува“ рече таа.
