Здружението на млади економисти организираше втора конференција во Бања Лука наречена „Know How – за Отворен Балкан“, каде што имаше дискусии за можностите и предизвиците на иницијативата „Отворен Балкан“, што може да донесе големи придобивки и за Босна и Херцеговина и за Република Српска, пренесува РТВБН.
„Сведоци сме дека денес има големи гужви во однос на транспортот на стоки и луѓе, така што оваа иницијатива треба да овозможи полесно функционирање меѓу земјите кои се нејзини членки“, изјави Златан Клокиќ, министер за Европска интеграција и меѓународна соработка на Република Српска.
Министерот за внатрешна и надворешна трговија во Владата на Република Србија, Томислав Момировиќ, изрази големо задоволство што ваквата конференција е организирана од млади економисти и ја истакна важноста на иницијативата „Отворен Балкан“.
„Мораме да го препознаеме овој политички момент, ова е моментот кога Балканот треба да се поврзе економски, мораме да ги укинеме сите непотребни гранични процедури бидејќи само така можеме да генерираме нови инвестиции и да го зголемиме прометот на луѓе, стоки и да го подигнеме стандард на целиот наш народ“, рече тој.
Ова е позитивна тема и мора да завршиме со бирократски процедури кои одземаат многу време, велат од Сојузот на стопански комори на Република Северна Македонија.
„Ние мора прво да работиме со нашите соседи, а потоа да соработуваме со земјите од Европската унија. Мораме сите да дадеме соодветен придонес, позитивни идеи и да разбереме дека многу работи зависат од нас и да се вклучиме во овој процес“, рече Трајан Ангелоски, претседател на Сојузот на стопански комори на Северна Македонија.
