Со корупција се соочува секоја држава, дури и оние кои имаат многу низок степен на корупција, немаат нула корупција, вели потпретседателот на СДСМ, Стефан Богоев во интервју за Фокус. Според него тоа е прашање на коешто во континуитет треба да се работи. Тој додаде дека од друга страна, во 30 години независност не постоеле случаи кога високи владини функционери одговарале кога нивната партија е на власт.
– Кога специјален јавен обвинител, одговарал додека бил на позиција? Тоа се работи коишто првпат се случија во мандат на СДСМ. Сметам дека тоа сериозно ја подобрува ситуацијата со корупцијата. Далеку е од решена и искоренета. За корупцијата треба да се зборува јавно и гласно. Опозицијата пред да го прави тоа треба да погледне кај себе. Тие обвинуваат за плацеви, парцели и ниви, а токму нивни луѓе се организатори на „Делчевски ниви“. Претходно истите тие луѓе обвинуваа градоначалници на СДСМ, а сега нивните градоначалници се фатени со рацете во медот, вели Богоев.
Тој во интервјуто отвори сомнежи и за можна поврзаност на раководството на ВМРО-ДПМНЕ со бизнисот со одгледување канабис.
-ВМРО-ДПМНЕ обвинуваше и критикуваше за одгледување марихуана за масло од канабис. Дали е точно дека играчи блиски до ВМРО-ДПМНЕ, вмешани во „Делчевски ниви“ во највисоките ешалони се вмешани и во фабрика за одгледување канабис? Фабриката се наоѓа во општина Петровец. И дали еден од клучните луѓе блиски на Мицкоски, кои е вмешан и во „Делчевски ниви“ е еден од сопствениците, а другиот сопственик е Русин со руски капитал? И дали по ширење на оваа работа низ политичките кулоари, човекот се повлече од сопственичката структура и остави негови блиски да ја водат работата? Лицемерно е ВМРО-ДПМНЕ да зборува за овие работи. Како и досега, битката со корупцијата ќе ја продолжиме. Тука се важни и коренети промени во правосудството. Очекувам дека за брзо СДСМ и Владата ќе излезат со конкретни активности и пакет за реформи, кажа Богоев.
