Министерката за одбрана Славјанка Петровска денеска ја посети касарната „Страшо Пинџур“ во Петровец каде е сместена Првата пешадиска бригада која е и најголема единица на Армијата.
-Во касарната во Петровец, министерката изврши обиколка на армискиот објект кој по четиримесечната реконструкција денеска претставува вистински репрезент за НАТО Армија во која стандардот на припадниците и нивните услови за работа се прв приоритет, соопшти Министерството за одбрана.
Петровска изрази задоволство од подобрувањето на условите за припадниците на Армијата.
– Драго ми е што бројките и фактите кои ги претставуваме, а се однесуваат на подобрувањето на условите за работа на армиските припадници, денеска ги гледаме во реалноста. Времето во кое армиските објекти се оставени на забот на времето заврши и затоа решително и плански објектите кои и се потребни на Армијата ќе го имаат и ликот достоен за Армија и држава членка на НАТО, рече Петровска.
Мнистерството информира дека целосната реконструкција на објектот чинеше 21,7 милиони денари и опфати замена на електрична и водоводна инсталација, инсталација за греење, нова покривна конструкција, нови прозорци, реконструирани санитарни јазли, целосна замена на врати и подови, како и поставување термичка фасада.
-Согласно Планот за повисоки еколошки стандарди во одбраната, наречен Еко-одбрана, објектот се реконструираше и со цел зголемување на неговата енергетска ефикасност. Според планот на Министерството, оваа година ќе почне реконструкција на најмалку пет дополнителни објекти од значење на одбраната и Армијата, наведува МО.
Во касарната во Петровец, министерката Петровска ја отвори и новата спомен-соба посветена на Првата пешадиска бригада, која сведочи за долгата традиција на оваа единица, како наследник на 14. Македонско-младинска народноослободителна ударна бригада формирана во 1944 година и на Кичевско-мавровскиот партизански одред.
-Не постои доволно голема просторија која може да го собере сето она што е направено во нашата држава и од вас кои сега ја носите оваа униформа и тоа го правите со гордост, и од сите оние кои ги положија животите за државата. Темелите на оваа држава се многу значајни за сите нас и ме радува фактот дека после триесет години и сите стратешки цели кои ги постигнуваме и се развиваме, тие се битни за сите нас. Ваквите спомен-соби се само уште еден поттик да создадеме еден голем Воен музеј, зашто македонската Армија има традиции од многу одамна, рече министерката на отворањето на спомен-собата.
