Со оглед на тоа дека се стабилизираат цените на струјата во последно време ќе ја разгледаме можноста и доколку стигне барање од општините дека е потребно да се пушти Хидросиостемот во летниот период, да речеме еден или два месеци за потребите на граѓаните, ќе го разгледаме тоа прашање, одговори министерката за животна средина и просторно планирање, Каја Шукова, на прашање на МИА по барањето на градоначалникот на Дојран повторно да проработи „Ѓавато“ во летниот период за да се дополнува со вода Дојранското Езеро.
Според Шукова, било нелогично што пред повеќе години управувањето со системот е дадено на управување на Министерството, кое дотогаш функционирало на база на јавно претпријатие и тоа било голема грешка.
-Во принцип Министерството не треба да управува со хидросистем. Пред неколку години Владата донесе одлука за повторно формирање на јавно претпријатие, но заради кризите кои не зафатија, овој процес остана на „стенд бај“, бидејќи со високите цени на струјата едно јавно претпријатие нема да може само да управува и тогаш ја избравме најнепопуларната мерка да го затвориме системот, рече минисетерката Шукова.
Таа смета дека се работи за еден извонреден систем кој може на Богданци и Дојран да му овозможи вода за пиење и наводнување. Како што рече, мора да се почека да се стабилизираат цените на електричната енергија, но никогаш не е мртва идејата дека ќе се напушти тој хидросиситем од кој се полнеше со вода Дојранското Езеро и се користеше за наводнување.
Инаку, градоначалникот на Дојран, Анго Ангов, пред неколку денови побара во летниот период да проработи Хидросистемот „Ѓавато“, иако Дојранското Езеро нема проблем со нивото на водата, кое на некои места ја надминува нулта котата, но во летниот период доаѓа до големо затоплување на водата и испарување, па дотекот на свежа вода е корисен за растителниот и животинскиот свет во Езерото.
