Тренерот на Арсенал, Микел Артета призна дека неговиот тим синоќа во дербито со Манчестер сити беше надигран од домаќинот.
„Граѓаните“ во натпреварот од 33. коло на шампионатот на Англија победија со 4:1.
„Бевме победени од најдобриот тим, тоа е сигурно. Беа одлични и тешко е да се постигне ова ниво. Денеска не бевме на тоа ниво. Против вакви ривали неопходно е да се биде добар во физичките дуели. Ние не го направивме тоа во првото полувреме и бевме казнети. Сити беше подобар од нас и не можевме да му парираме“, изјави Артета.
Запрашан што значи овој пораз за шампионската трка, тој одговори:
„Ова е многу тешка вечер за нас. Загубивме, но мора да станеме и пошироко да ја погледнеме ситуацијата. Фактот дека сме во директна борба со неверојатен тим како Сити. Ни претстојат пет натпревари и се може да се случи. Низ годините видов колку многу може да се случи во оваа лига“.
Тренерот на Манчестер сити, Хосеп Гвардиола рече дека знаат дека мора да победат на секој натпревар за да останат во трката за титулата
„Отсекогаш сме имале добра офанзивна линија, но врската меѓу Халанд и Де Брујне е неверојатна. Денес се обидовме да ги искористиме што е можно повеќе. Сити неколку пати по ред ја освојуваше Премиер лигата, па на почетокот на сезоната кажавме дека имаме време да го стигнеме Арсенал. Моите играчи знаат дека треба да победуваме за да останеме во борбата. Овој менталитет каде што немаш друг избор освен да победиш е најдобриот менталитет. Играчите покажаа дека на секој натпревар излегуваат на терен да ги освојат бодовите“, изјави Гвардиола.
Арсенал е лидер во Премиер лигата со 75 бода од 33 натпревари, Манчестер сити е втор со 73 бода од 31 натпревар.
