Министерството за информатичко општество и администрација во партнерство со Програмата за развој на Обединетите нации (УНДП) и Националниот сојуз на слепи лица денеска официјално ја промовираа верзијата за iOS уреди на софтвер-апликацијата за лицата со оштетен вид на македонски и албански јазик, симболично наречени Кико и Хана, која им овозможува пишан текст да слушнат и разберат во аудио верзија.
Секретарот на Националниот сојуз на слепи, Глигор Самарџиски истакна дека Кико и Хана во изминативе речиси три години станаа дел од секојдневието на сите лица со оштетен вид во нашата држава и веќе ја користат над 2.000 луѓе.
– Нив ги користеа и младите во училиштата и факултетите, но и вработените на своите работни места. Од овие гласови бенефитот нема да се однесува само на лицата со оштетен вид. Потенцијалот на овие гласови е се уште голем и со нивно адаптирање за работа и на Ајфон и Ајпад за овие гласови се отвораат нови можности, рече Самарџиски.
Тој потенцира дека во иднина се планира овие гласови да добијат уште поголема примена, односно да се слушаат во автобусите за најава на наредната автобуска станица или пак во банките на банкоматите, кои ќе ги исчитуваат менијата и копчињата, и на многу други места кои што ќе бидат од корист за лицата со оштетен вид.
Министерот за информатичко општество и администрација, Азир Алиу истакна дека веќе во постапка е вработување на говорен знаковен толкувач во МИОА. Тој посочи дека работат на тоа веб-страните на институциите да ги исполнуваат европските стандарди во кои што ќе имаат пристап и лица со попреченост.
– Работиме на тоа секој шалтер во државата освен што имаат информации каков тип на сервиси нудат, ние ќе ги задолжиме да имаат Кју-Ар код во кое што секое лице со попреченост при скенирање на Кју-Ар кодот ќе може да има предност за добивање на сервисите во таа одредена институција. Ние, како Министерство за информатичко општество и администрација сме дел од процесот на креирање на Стратегија за дигитализација на општеството и веќе работна група работи на креирање на дигитален еко-систем во кој што сите граѓани на нашата држава ќе се чувствуваат исто толку удобно и лесно да пристапат до системите, до процесите кои што ги нудиме како институција, рече Алиу.
Постојаниот претставник на Програмата за развој на Обединетите нации (УНДП), Армен Григорјан изрази задоволство поради тоа оваа апликација веќе е преземана и посочи дека тоа е добар доказ дека ова е нешто што е потребно и што ќе има позитивно влијание на животите на лицата со попреченост.
– Мора да одиме напред. Еден од принципите на УНДП е никого да не оставаме и да обезбедиме инклузивни решенија за сите делови на општеството, рече Григоријан.
