Велика Британија овој викендов прославува историски настан, крунисувањето на Чарлс Трети со верска церемонија стара 1.000 години и дводневна прослава во земјата со концерт во замокот Виндзор, објави Би Би Си.
Церемонијата на крунисувањето денеска започнува во 11:00 часот по лондонско време и ќе трае околу два часа под раководство на духовниот водач на Англиканската црква, надбискупот Џастин Велби.
Пред заминувањето на кралската двојка со кочија до Вестминстерската опатија, предвидено е пристигнување на високи личности од јавниот и политичкиот живот.
Верската церемонија ќе биде одбележана со музички дела од класичниот репертоар, како и со нови композиции, со цел да се претстави денешната улога на монархот кој гледа кон иднината, иако сè уште е вкоренет во историската традиција и луксуз.
Иако Чарлс Трети (74) сакаше поскромна церемонија со околу 2.300 гости, меѓу кои и странски државници, членови на други монархии и претставници на граѓанското општество, одредени етапи од церемонијата на крунисувањето не можат да се избегнат.
Чарлс ќе положи заклетва и ќе биде благословен од надбискупот од Кентербери, а потоа на неговата глава ќе биде поставена круната на Свети Едвард. Тој ќе добие кралска облека, кугла (златен глобус со крст) и кралски жезол.
Неговата сопруга кралицата Камила, втората сопруга на Чарлс по разводот со принцезата Дајана, исто така ќе биде крунисана.
Кралската двојка, придружувана од речиси 4.000 војници, со кочии ќе тргне кон Бакингемската палата. Кралското семејство потоа ќе се појави на терасата на палатата за да ги поздрави присутните.
Прославата во Велика Британија по повод крунисувањето на кралот ќе трае два дена. Утре во Бакингемската палата на отворено ќе се организира таканаречениот „голем ручек“, каде ќе се дели јадењето „кралско киш“, специјално подготвено за оваа церемонија.
Утре вечер ќе има концерт во замокот Виндзор пред околу 20.000 луѓе.
Понеделник ќе биде неработен ден. Кралското семејство претходно ги повика Британците на тој ден да спроведат волонтерски активности.
Г. Т.
