Лидерите на Г7 пристигнуваат денеска во Хирошима каде од утре до сабота ќе одржат самит на кој ќе разговараат за построги санкции кон Русија и заштитата од кинеската „економска принуда“.
Јапонскиот премиер Фумио Кишида ќе биде домаќин на лидерите на шесте други најбогати земји, во неговиот роден град – град синоним за нуклеарно уништување.
Во текот на следните три дена, лидерите, вклучително и американскиот претседател Џо Бајден, ќе се обидат да формираат обединет фронт за Русија, Кина и ќе разговараат за уште многу други неодложни прашања во кои интересите на сојузниците не се секогаш усогласени.
Сепак, во фокусот на разговорите ќе биде руската 15-месечна инвазија врз Украина.
– Ќе има дискусии за состојбата на фронтот, изјави американскиот советник за национална безбедност Џејк Саливан.
