Публиката која оваа година ќе присуствува на второто издание на Нихон-џи фестивалот за јапонска култура што ќе се одржи на 27-ми мај во Мала Станица, во организација на Japan@mk, ќе има одлична можност да се доближи до Јапонија на повеќе начини, вклучувајќи и работилници и презентации поврзани со јапонската традиционална и поп-културата.
Овогодинешната програма е збогатена со работлници и презентации за калиграфија и оригами, предводени од Јуко Сакагучи и Чие Нагашима, професорка по јапонски јазик.
Во делот со оригами, своја работилница ќе има и Мила Симовска која ќе ја воведе публиката во техниката за изработување модуларно оригами, додека пак Кирил Петковски ќе одржи презентација и работилница за напредно оригами изработено од едно парче хартија. Негови импресивни оригами дела ќе бидат исто така изложени во изложбениот салон на Мала Станица.
Своја работилница и презентација ќе има и Сивус центарот за едукација и развој, каде присутните ќе можат да научат повеќе за историјата на самата наука и основите на електрониката и механиката. Публиката ќе се запознае со основните принципи на роботите, нивната примена, како и процесите при креирање и програмирање на еден робот.
Фокусот на технологијата се провлекува и преку презентацијата на Елена Трајкоска-Бојаџиска која ќе ја открие механичката магија на аутомата и каракури куклите. Елена ќе ја воведе публиката во богатата историја на аутомата куклите кои се дизајнирани да имитираат движења на луѓе или животни преку низа однапред дефинирани дејства. Во Јапонија тие се познати како каракури – термин кој во превод означува „механизам” .
Професионалниот илустратор Ристо Манасиев, пак, ќе одржи презентација на резултатите од затворената Манга работилницата (одржана на 20-ти мај, во Бруталиск), каде учесниците научија за принципите на манга цртањето, додека пак Ива Стојческа, реномиран косплеј уметник со децениско интернационално искуство, ќе ги презентира резултатите од затворената Косплеј работилницата (одржана на 6-ти мај во Центар Јадро).
Во рамките на фестивалот, и оваа година, љубителите на поезијата ќе имаат можност да уживаат во хаику перформанс на македонски хаику поети, меѓу кои се вбројуваат: Владимир Мартиновски, Николина Андова, Искра Донева, Дејан Василевски и Александар Маџаровски.
Покрај бројните работилници и презентации, Нихон-џи на својата публика ѝ ветува незаборавно искуство преку изложби, мода, проекции, трибини, игри, боречки вештини и продажен дел.
Фестивалот Нихон-Џи е единствениот од својата природа во земјата, а сите заинтересирани за повеќе информации може да погледнат фотографии, видеа или други информации за сите настани на Јапан@мк на било кој од социјалните медиуми (Instagram, Facebook, Youtube) како и на страната japan.net.mk.
Деталната програма за фестивалот е достапна на нивната офицјална веб страна, како и Фејсбук настанот.
