Министерката за одбрана Славјанка Петровска која престојува во повеќедневна посета на САД, ги посети Државниот Универзитет на Северна Каролина и Институтот за безбедносни студии Triangle, соопшто МО.
Министерката Петровска се сретна со проректорката, проф. д-р Хајди Хобс, директорката за глобални партнерства Сара Олсон, и директорот на мастер програмата за меѓународни студии проф. д-р Марк Нанс. На средбата, Петровска го истакна значењето на академската заедница во борбата против најновите безбедносни закани и порача дека можноста за соработка со овие високо-образовни институции ќе придонесе за зајакнување на едукацијата и подготвеноста на идните офицери и лицата од одбранбениот сектор во справувањето со нив.
По средбата министерката Петровска се обрати пред студентите, професорите, членовите на алумни-асоцијацијата на Универзитетот и експертската јавност при што изрази уверување дека оваа посета го трасира патот за долготрајна плодна соработка.
– Денес сме тука да ги зајакнеме нашите врски и заедно со вас професорите и студентите, да го отвориме патот за градење на идните стратегиски предвидувања на геополитиката во регионот и во светот. Уверени сме дека заедно можеме да ја постигнеме заедничката цел за регионална стабилност и зачувување на меѓународниот поредок заснован на правила, истакна Петровска.
Во однос на идната соработка меѓу образовните институции, Петровска рече дека академската заедница со размената на знаења ќе придонесе во градењето отпорност на нашите општества.
– Во оваа сложена геостратешка средина, единството, солидарноста и кохезијата на Алијансата остануваат клучни. Заедно со нашите сојузници и стратешки партнер, САД, стоиме заедно во нашата цел – зачувување на глобалниот мир и безбедност, рече Петровска.
