Четириесет и петгодишниот И.П., вработен во затворот „Идризово“, на 18 мај годинава му отворил врата на осуденикот Д.К. од Куманово, овозможувајќи му бегство.
МВР информира дека Единицата за корупција при Одделот за сузбивање на организиран и сериозен криминал (ОСОСК) денеска до ОЈО за гонење на организиран криминал и корупција поднесе кривична пријава против И.П. од Скопје, за сторено кривично дело „противзаконито ослободување на лице лишено од слобода“.
– Имено, И.П. во својство на службено лице-затворски полицаец при КПУ-КПД Идризово Скопје, на 18.05.2023, додека бил на смена, на барање на Д.К. од Куманово, осуден за издржување казна затвор до 2027 година за сторени кривични дела по член 237 став 1 и член 396 став 1 од Кривичниот законик, со затворен третман, му ја отворил вратата кон Отвореното одделение, овозможувајќи му истиот да избега од КПУ Идризово, соопштуваат од полицијата.
Од МВР истакнуваат дека со вака преземените дејствија И.П. постапил спротивно на процедурите, надлежностите и работните задачи и обврски за обезбедување, со што сторил кривично дело „противзаконито ослободување на лице лишено од слобода“, по чл. 373 од Кривичниот законик.
