Додека не се донесе новиот Закон за средно образование, што е во процедура, родителите на средношколците со атипичен развој да се обраќаат до самото училиште за обезбедување на образовен асистент, велат од Министерството за образование и наука во одговор на прашање од „Фронтлајн“ за тоа „Што презема МОН за обезбедување на образовни асистенти за средношколците со атипичен развој?“.
„Со изработката на новиот Закон за средно образование кој е во процедура, услугата образовна асистенција бесплатно ќе се воведе и во средните училишта, а во меѓувреме за оваа цел образовни асистенти за средношколци во општински средни училишта се ангажираат преку програма за општинско корисна работа, склучена помеѓу општините, Град Скопје, МОН, МТСП и УНДП како финансиер. Родителите на учениците се обраќаат до самото училиште за обезбедување на образовен асистент“, стои во одговорот од МОН на прашањето од Фронтлајн.
На првиот училишен ден, родители на средношколци со атипичен развој реагираат дека и оваа година не се обезбедени образовни асистенти за овие ученици.
„Започна уште една школска година во која државата не обезбеди образовни асистенти за средношколците со атипичен развој! Законот за средно образование заглавен во лавиринтите на неспособност, незаинтересираност, бахатост стои во некоја фиока да собира прашина“, реагираше во објава на Фејсбук, Доминика Кардула.
Таа истакна дека „дискриминацијата пак вирее на отворено, затворено и во сите сегменти од животот на лицата со атипичен развој!“.
Ј. Ѓорѓиоски
Поврзано:
