Фрапантни и згрозувачки се јавно достапните информации за сомнежите за злоупотреба на терапијата за лицата болни од рак. Наместо на тие лица соочени со најтешката дијагноза да им пружи целосна поддршка и заштита, здравствениот систем очигледно потфрлил, со што е изгубена довербата не само кај тие болни, туку е доведен во прашање и квалитетот на лекување на секој иден пациент, оценува претседателот на државата Стево Пендаровски по последните случувања на Универзитетската клиника за радиотерапија и онкологија.
Пендаровски повикува на брзо и ефикасно комплетирање на истрагата и на судско-обвинителско процесуирање без селективност, како и на соодветна казна за сите за кои ќе биде докажано дека сториле тешки дела против здравјето на луѓето.
Според него, крајно време е системот да потврди дека сме способни во пракса, а не само со зборови да се справуваме со тешките облици на организиран криминал и корупција и конечно да ја прекинеме културата на неказнивост за сериозни прекршувања на законите.
Како што наведува Пендаровски во својот писмено изнесен став, никогаш нема да бидеме вистинско европско општество со одолговлекување на судските постапки и отсуство на лична одговорност. За здраво општество, потенцира, ни треба правна држава во пракса, а не на хартија.
-Во насока на целосно расчистување на оваа огромна афера, ги поздравувам досега преземените дејства од страна на Јавното обвинителство и Министерството за внатрешни работи. Во исто време повикувам на брзо и ефикасно комплетирање на истрагата и на судско-обвинителско процесуирање без селективност и соодветна казна за сите за кои ќе биде докажано дека сториле тешки дела против здравјето на луѓето. Потполно го разбирам гневот на граѓаните кои повикуваат на мирни протести, барајќи одговорност од оние кои заработувале на маките на најтешко болните наши граѓани, вели претседателот Пендаровски.
Премиерот Димитар Ковачевски, во изјава вчера, истакна дека одговорноста има име и презиме, по 20 години за прв пат има обемна акција на МВР и Јавното обвинителство на Клиниката за онкологија.
„Јас лично како премиер на Владата на Република Северна Македонија и политичката партија од која потекнувам, ја поздравувам и поддржувам акцијата која ја спроведува МВР и Јавното обвинителство. Се работи за наводи кои се грозни и коишто не смеат да се случуваат, а за кои наводи сме слушале во текот на изминатите 20 години. Ова е прв пат да биде спроведена една ваква, обемна акција за идентификување на можни сторители на вакви дела. Секој криминал има свое име и презиме, има одговорност и задачата на МВР и Јавното обвинителство е да обезбедат докази врз основа на кои ќе бидат идентификувани сторителите, а повторувам, од страна на претседателот на Владата на Република Северна Македонија и од Владата нема да има никакви интервенции во однос на заштита на било кого, бидејќи се работи за навистина грозни наводи коишто се предмет на истрагата на МВР и Јавното обвинителство“, изјави претседателот на Владата на Република Северна Македонија, Димитар Ковачевски, во врска со акцијата на надлежните институции на Клиниката за онкологија, а по објавените информации во јавноста за можни злоупотреби на клиниката.
Премиерот повика да не се прави сензационализам и напад на сите доктори и сестри во државата бидејќи најголемиот дел од медицинскиот персонал во нашата држава, како што оцени премиерот Ковачевски, се извонредни луѓе, кадри кои се грижат за здравјето на нашето население.
„Гледам по медиумите, посебно социјалните медиуми дека се сака да се креира слика за вмешаност само на одредени лица, зависно од нивната припадност. Она што можам да го кажам е дека ваков тип на криминал е мултипартиски, мултиетнички и мултикултурен и затоа повикувам и МВР и обвинителството непречено да ја извршуваат својата работа, да ги идентификуваат можните сторители врз основа на докази и затоа ја имаат нашата целосна поддршка“, нагласи премиерот Ковачевски.
Поврзано:
