Европската комисија денеска објави упатство наменето за правните субјекти во ЕУ, кое треба да им помогне да ги идентификуваат, проценат и сфатат можните ризици од заобиколувањето на воведените санкциите и како да го избегнат тоа.
– Оваа упатство има за цел да обезбеди општ преглед на она што треба да го прават операторите кога вршат длабинска анализа во нивната работа, како што бара правото на ЕУ. Според правото на ЕУ, операторите од ЕУ имаат обврска да вршат длабинска анализа при тргување со трети земји за да се осигураат дека нивните деловни партнери не ги заобиколуваат санкциите на Унијата, се посочува во соопштението на Еврокомисијата.
Како што јави специјалниот известувач на МИА од Брисел, упатството е замислено како практичен водич кој ги наведува чекорите што треба да ги применуваат компаниите при спроведување на стратешките проценки на ризик, со цел колку што е можно да ја ублажат нивната изложеност на шеми за заобиколување на санкциите.
Упатството содржи и листа на индикатори кои се дизајнирани со цел да ги предупредат европските компании за можни ризици кога стапуваат во комерцијални односи со нов трговски партнер.
ЕК потсетува дека по руската агресија врз Украина, ЕУ воведе рестриктивни мерки кон Русија и руски субјекти.
– Соочена со обемот на овие санкции, Русија создаде се поелаборирани шеми и техники за да ги заобиколи овие мерки. Со користење на такви сложени методи, Русија се обидува да ги набави стоките што очајно му се потребни на нејзиниот воено-индустриски комплекс за да продолжи со својата агресивна војна против народот на Украина, се наведува во соопштението.
Во врска со објавеното упатство, еврокомесарот за финансиски услуги и стабилност и за пазарот на капитал Мејрид Мекгинис потенцира дека санкциите на ЕУ имаат вистинско влијание врз руската способност за водење на војната, па затоа Русија „очајно бара начини да ги заобиколи“. – Напорите што ги прави Русија за да ги заобиколи нашите ограничувања се се покомплексни и непрепознатливи. Ова практично упатство ќе им помогне на извозниците од ЕУ да ги забележат „црвените знамиња“ и да го намалат ризикот од избегнување на санкциите, изјави Мекгинис, додавајќи дека поддршката на ЕУ за Украина е постојана.
