Комисијата за заразни болести на Министерството за здравство ќе му препорача задолжително да се користат маски во здравствените установи како превенција од ширење на Ковид-19, а сè уште се работи на утврдување дали е присутна новата варијанта на вирусот ерин. Препораката, што е усвоена на денешниот состанок на Комисијата за заразни болести, е само за во здравствените установи, и не се однесува за во аптеките или домови за стари лица.
– Тоа е со цел да се минимизира можност за пренесување на заразата во здравствените институции, таму каде што имаме особено ранливи групи, коишто можат да бидат подложни на тешка компликација како резултат на зараза со вирусот кај коишто може да се јави летален исход. Од тие причини Комисијата за заразни болести реши повторно да препорача до Министерството за здравство и до министерот да се побара задолжително носење на маските во здравствените установи, информираше д-р Злате Мехмедовиќ, претседател на КЗБ.
Комисијата за заразни болести сè уште нема дефинитивен резултат дали станува збор за варијантата наречен ерис. Од Институтот за јавно здравје добиле информација дека подолго време трае процедурата за собирање на материјалот бидејќи, има само мал број, 112 заболени со Ковид-19.
– Потребно е да се соберат релевантни количини на примероци, не само од регионот на Скопје туку и од останатите региони. Во наредниот се надеваме брзо, затоа што како што кажав мала е бројката на сите оние кои се позитивно тестирани. Очекуваме да добиеме детална информација за тоа колкав е бројот. Во Србија е потврден Ерис меѓутоа во Србија има значителен број на случаи коишто даваат поголема количина на инфективен материјал и може да се детектира во помали трагови, меѓутоа кај нас поради тоа што имаме мал број на случаи, еве споредено, во однос на август 2022 година кога имавме 12.300 случаи за август сега имаме само 112. Не може толку лесно да се собере инфективниот материјал којшто треба да се одработи, потенцираше докторот.
Во моментот има седум болнички лекувани, претежно пациенти коишто се во поодмината возраст коишто имаат придружни болести.
– Се на кислородна поддршка некои од нив што значи дека кај некои од нив може да се јави тешка форма на болеста. Апелираме препораките се особено повозрасните граѓани и оние коишто имаат пропратно и хронични болести да се вакцинираат. Да го бустираат својот имунитет, на располагање се 50 илјади вакцини коишто се од Министерството за здравство и само на тој начин навистина можат да бидат подготвени за наредниот период кога очекуваме раст на бројките. Не очекуваме да има драстичен раст како што имаше во текот на изминатите години но меѓутоа во период кога ќе растат бројките само преку вакцинација ќе може да си го заштитат својот имунитет, рече д-р Мехмедовиќ.
Иако во јавноста се шпекулира дека Ковид-19 сега често предизвикува дијареја и повраќање, според Мехмедовиќ искуствата од другите земји, како пример во Америка, покажуваат дека поретко се јавуваат тие два симптоми и нема губење на сетилото за мирис и за вкус
– Најчесто симптомите се поврзани со течење на носот, болки во грлото, покачена телесна температура и омалаксаност, многу наликува на секоја друга настинка. Многу ретко се заразат долните дишни патишта, останува како горнореспираторна зараза, така да нема голема разлика од останатите варијанти, истакна Мехмедовиќ.
Нема да има потреба за изолација на заразените било одлучено на состанокот.
– Не препорачуваме изолација, не препорачуваме да се издаваат решенија за забрана за движење. Напротив ова ќе го третираме буквално како секоја друга болест којашто е ендемска како што е грипот. Препораките се доколку немате изразена симптоматологија и не ви е потребно боледување, ќе носите маска и со маска ќе може да се движите слободно дури и да бидете на работа, истакна Мехмедовиќ.
На состанокот е разгледана целокупната ситуација во државата и по однос на тоа каква е состојбата и со вакцинацијата, со бројот на вакцини кои се на располагање, со бројот и видови на лекови. Заклучокот е дека во моментов имаме доволно лекови и вакцини што може да се стават на располагање со цел третман на болеста.
