Министерката за одбрана Славјанка Петровска, заедно со словенечкиот министер за одбрана Марјан Шарец кој престојува во официјална посета на Северна Македонија денеска учествуваа на панел – дискусија на тема „Научени лекции, споделени искуства и идни предизвици на кризниот менаџмент и цивилната заштита: Словенија и Северна Македонија“. Свои излагања на панел-дискусијата имаа и првиот министер за одбрана, професорот Трајан Гоцески и доц. др. Весна Попоска.
На панел-дискусијата, министерката Петровска порача дека неопходно е во овој сегмент да учиме едни од други и да работиме и живееме едни со други, затоа што природните катастрофи стануваат се посурови, а адаптацијата е сè потешка.
„Пред две години, во екот на летните пожари, Словенија испрати 16 противпожарни возила и 46 пожарникари кои имаа клучна улога во справувањето со заканата и кои спречија загуба на човечки животи и материјална штета. Пред само неколку месеци, ние и бевме потребни на Словенија во справувањето со поплавите и нашата армија беше тука за словенечките граѓани, докажувајќи дека во справувањето со катастрофи нема мали и големи и земји, туку само големи луѓе и сериозни институции кои се поддржуваат едни со други секогаш кога е тоа потребно бидејќи само заедно, може да чекориме рамо до рамо напред низ животот и случувањата“, истакна Петровска
Министерката порача дека неопходно е националните механизми за кризен менаџмент и цивилна заштита постојано да се оценуваат и надградуваат за да можат да одговорат на потребите на граѓаните.
„Министерството за одбрана поведе иницијатива и е во фаза на мапирање на слабостите и изнаоѓање на решенија кои се соодветни, реални, економични и ефикасни и во догледно време штом заврши процесот на евалуација, до Владата ќе предложи реформа на системот за кризен менаџмент и цивилна заштита, согласно НАТО стандардите. Во тој процес, примерот на Словенија ни е исклучително важен и извесно е дека тој би бил еден од прифатливите модели кои ќе ни послужат како рамковна политика“, порача Петровска.
На панелот министерот Шарец ги презентираше искуствата од поплавите кои ја зафатија Словенија во август и искрено и се заблагодари на министерката Петровска за сета важна поддршка што Република Северна Македонија и ја пружи на Словенија во овие тешки и неизвесни моменти.
Шарец го образложи словенечкиот модел на организација на кризниот менаџмент и порача дека државите мора да соработуваат едни со други бидејќи ниту една земја не може самостојно да се носи со овие предизвици. Заедно можеме сè, рече Шарец, и додаде дека Северна Македонија може секогаш да смета на Словенија за соработка во оваа област.
