На шпанскиот остров Тенерифе, властите евакуираа околу 3.000 луѓе од нивните домови во текот на ноќта, бидејќи шумскиот пожар предизвикан од високите температури и силните ветрови се прошири низ шумската област која веќе беше опустошена од пожар во август.
Службите за итни случаи објавија на платформата за пораки X, поранешен Твитер, дека побарале помош од воената единица за одговор при итни случаи, наведувајќи го пожарот што избувна вчера како итен случај на високо ниво.
Шумскиот пожар во август гореше со денови, уништувајќи околу 15.000 хектари шума во националниот парк околу вулканот Монт Теиде, највисокиот врв во Шпанија. Илјадници беа исто така евакуирани тогаш, а повеќето се вратија во своите домови.
Регионалниот шеф на Канарските Острови, Фернандо Клавихо на деловен состанок во Мадрид изјави дека пожарот бил ставен под контрола во август, но никогаш не бил целосно изгаснат, а жарот сè уште гори во шумата.
Тој рече дека напорите за гаснење на пожарот во текот на ноќта „поминале добро“.
Островот во Атлантикот во близина на северозападниот брег на Африка е во состојба на готовност поради високи температури, кои се очекува да достигнат до 39 Целзиусови степени.
